“Mançester Siti”nin baş məşqçisi Enzo Mareska klubun maliyyə qaydalarını pozmaqda təqsirli bilinməsi ilə bağlı vəziyyətə münasibət bildirib. İtaliyalı mütəxəssis rəhbərliyə tam etibar etdiyini açıqlayıb.
İdman.Biz xəbər verir ki, Mareska “İpsviç”lə oyun öncəsi keçirilən mətbuat konfransında meydandan kənarda baş verən hadisələrin onu narahat etmədiyini vurğulayıb.
“Biz bu vəziyyətin öhdəsindən kifayət qədər yaxşı gəldik. Azarkeşlər, komanda - hər kəs. Sabah “İpsviç”lə görüşdə də “Enfild”dəki səfər oyununda olduğu kimi üç xal qazana bilərik. Uğurlu seriyamızı davam etdirmək və qalib gəlmək vacibdir.
Dəfələrlə demişəm ki, meydandan kənarda baş verənlərə görə heç bir təzyiq hiss etmirəm. Bu vəziyyətə nəzarət edə bilmirəm. Bütün diqqətimi növbəti oyunlarda necə qalib gələcəyimizə yönəltmişəm. PSJ-yə məğlubiyyətə gəlincə, onlar çox təhlükəli rəqibdir və oyuna bütöv bir həftə hazırlaşmışdılar. “İpsviç”lə matç da bizim üçün çox çətin olacaq. Bu, vacib qarşılaşmadır və üstünlüyümüzü altı xala çatdırmaq üçün yaxşı fürsətdir”, - deyə Mareska bildirib.
Baş məşqçi klub ətrafındakı müzakirələrə də toxunub:
“Mən insanlara hörmətlə yanaşıram. Hər kəsin istədiyini söyləmək və öz fikrini bildirmək hüququ var. Amma məncə, ən ağıllı addım yekun qərarı gözləməkdir.
İnsanlar bu vəziyyəti müzakirə etmək istəyirlər. Mən kluba tam etibar edirəm və kənardakı insanların baş verənləri anlamasına ehtiyac duymuram. Mənim üçün hər şey tamamilə aydındır: kluba yüz faiz güvənirəm”.
Qeyd edək ki, “Mançester Siti” 2009–2018-ci illərdə maliyyə qaydalarının pozulması ilə bağlı aparılan araşdırmadan sonra ittiham olunub.
