"Mançester Siti"nin yarımmüdafiəçisi Rodri "Real Madrid"dənsə "Barselona"ya keçməyə üstünlük verdiyini bildirib.
İdman.Biz jurnalist Fabris Houkinsə istinadən bildirir ki, oyunçunun mövqeyindən həm Mançesterdə, həm də Madriddə xəbərdardırlar.
"Marca"nın jurnalisti Matteo Morettoya görə isə Rodri "Barselona" ilə müqaviləsinin maliyyə şərtlərini razılaşdırıb.
Mənbənin məlumatına əsasən, "Mançester Siti"nin yarımmüdafiəçisi danışıqlarda həlledici addımı "Real Madrid"in atmasını gözləməkdən bezib. "Barselona" oyunçuya onun transferi ilə bağlı ingilis klubu ilə fəal şəkildə dialoqa hazır olduqlarını bildirib. Kataloniyalılar yaxın saatlarda rəsmi olaraq "Mançester Siti" ilə əlaqə saxlayacaqlar.
"Barselona" bir müddətdir ki, oyunçu ilə maraqlanır və yarımmüdafiəçi Frenki de Yonqun zədələnməsindən sonra bu maraq daha da artıb. Klub hesab edir ki, Rodri məşqçi Hans-Diter Flikin sisteminə ideal uyğunluq yaradacaq. Oyunçu özü də əmindir ki, o, Kataloniya klubunun oyun tərzində inkişaf edəcək.
"Barselona" indi transferi başa çatdırmaq üçün maliyyə mənbələri tapmalıdır. 60-70 milyon avroluq təkliflər "Mançester Siti"nin tələblərini ödəmək üçün kifayət edə bilər. Həmçinin bildirilib ki, Flik Rodri ilə telefon danışığı aparıb və bu danışıq zamanı klubun inkişaf strategiyasını və əməkdaşlıq perspektivlərini açıqlayıb. "Real Madrid"lə danışıqlar dayandırıldığı üçün Rodri "Barselona"ya keçməyi daha real variant kimi nəzərdən keçirməyə başlayıb.
Əlavə amil onun hazırkı "Barselona" oyunçuları, o cümlədən Lamin Yamal ilə əlaqələri olub. Söhbətləri zamanı onlar Rodriyə komandanın atmosferi və klubun strukturuna uyğunlaşmağın çətinlikləri barədə danışdılar. Bu, oyunçunun qərarına da təsir etdi.
