UEFA Avropa Liqasının 4-cü turunda bu gün 18 qarşılaşma keçirilir.
İdman.Biz bildirir ki, Avstriyanın “Şturm” klubu İngiltərənin “Nottingem Forest”ini qəbul edib.
Qratsdakı “Merkur Arena”da keçirilən oyun 0:0 hesabı ilə başa çatıb. 35-ci dəqiqədə “Forest”in yarımmüdafiəçisi Morqan Gibbs-Uayt penaltidən yararlana bilməyib.
Fransanın “Nitsa” klubu öz meydançasında Almaniyanın “Frayburq”unu qəbul edib. Oyun 3:1 hesabı ilə qonaqların qələbəsi ilə qurtarıb.
Xorvatiyada yerli “Dinamo Zaqreb” İspaniyanın “Selta” klubunu qəbul edib. Bu matç da qonaqların qalibiyyəti ilə yekunlaşıb - 3:0.
Qonşu Serbiyada isə “Srvena Zvezda” Fransanın “Lill” klubunu qonaq edib. 85-ci dəqiqədə Marko Arnautoviçin penaltidən vurduğu qol meydan sahiblərinə qələbə gətirib - 1:0.
Danimarkada keçirilən oyunda isə yerli “Midtyullann” Şotlandiyanın "Seltik" klubundan üstün olub. Matç 3:1 hesabı ilə bitib.
İsveçdə isə “Malmö” Yunanıstanın “Panatinaikos” klubunu sınağa çəkib. 85-ci dəqiqədə qonaqların oyunçusu Filipp Curiçiçin vurduğu qol oyunda yeganə olub - 0:1.
Niderlandın Utrext şəhərində isə eyniadlı komanda “Porto” ilə üz-üzə gəlib. Qarşılaşmada qalib olmayıb - 1:1.
Avstriyanın “Zalsburq” klubu Yorbe Vertessenin 59-cu və Aleksa Terziçin 80-ci dəqiqələrdə vurduqları qollarla Niderlandın “Qo Ehed İqls” kollektivini məğlub edib - 2:0.
İsveçrədə isə yerli “Bazel” Rumıniyanın FKSB klubundan üstün olub - 3:1.
