Azərbaycanın kişi voleybol millisi Gümüş Avroliqada starta hazırlığını başa çatdırıb.
İdman.Biz Azərbaycan Voleybol Federasiyasına istinadən xəbər verir ki, Boris Qrebennikovun rəhbərlik etdiyi komanda Ankarada təlim-məşq toplanışının yekun mərhələsini başa vurub və iyunun 5-də turnirin birinci turunun oyunlarının keçiriləcəyi İsveçə yollanacaq.
Toplanış çərçivəsində Azərbaycan voleybolçuları Türkiyə millisi ilə iki yoxlama oyunu keçiriblər. Görüşlərdən birində meydan sahibləri 3:0 hesabı ilə qalib gəlib, ikinci qarşılaşma isə heç-heçə başa çatıb - 2:2.
Azərbaycan millisi Avroliqada ilk oyununu iyunun 6-da Yunanıstan komandasına qarşı keçirəcək. Ertəsi gün, iyunun 7-də Azərbaycan voleybolçuları meydan sahibləri - İsveç yığması ilə qarşılaşacaqlar.
