Yaponiyanın kişilərdən ibarət voleybol millisi Millətlər Liqasının ilkin mərhələsini məğlubiyyətsiz başa vuran ilk komanda olub.
İdman.Biz xəbər verir ki, Loran Tillinin rəhbərlik etdiyi kollektiv son turda Argentina yığmasını 3:0 hesabı ilə məğlub edib.
Osakada keçirilən qarşılaşmada Yaponiya hər üç setdə üstün olub - 25:22, 25:22, 25:16.
Asiya təmsilçisi ilkin mərhələdə keçirdiyi 12 matçın hamısında qələbə qazanaraq turnir cədvəlini 30 xalla birinci pillədə tamamlayıb. Yaponiya üç görüşdə 3:0, üç qarşılaşmada 3:1, altı oyunda isə 3:2 hesabı ilə qalib gəlib.
Bununla da Yaponiya kişi komandaları arasında Millətlər Liqasının ilkin mərhələsini məğlubiyyətsiz tamamlayan ilk yığma kimi tarixə düşüb. Əvvəlki ən yaxşı göstəricilərdən biri 2024-cü ildə 12 matçda 11 qələbə qazanan Sloveniyaya, digəri isə 2025-ci ildə eyni nəticəni göstərən Braziliyaya məxsus olub.
Millətlər Liqasının son qalibi Polşa millisidir. Polşalı voleybolçular 2025-ci ildə keçirilən finalda İtaliyanı 3:0 - 25:22, 25:19, 25:14 hesabı ilə məğlub ediblər.
