Azərbaycan Həndbol Federasiyasının rəhbərliyi ətrafında yaranmış vəziyyət oyunçuların maddi durumuna ciddi təsir edib. Həndbolçuların maaş almağı dayandırmasından əlavə, çempionat və arena da əllərindən çıxıb, onların bir çoxu fəaliyyət sahəsini tamamilə dəyişmək məcburiyyətində qalıb.
Bu barədə “Azəryol” klubunun və Azərbaycan millisinin həndbolçusu, V İslam Həmrəyliyi Oyunlarının gümüş medalçısı Azaliya Həsənova İDMAN.BİZ-ə açıqlamasında bildirib.
Həndbolçu qeyd edib ki, federasiya onlara ölkədə həndbolun maliyyələşdirilməsinin dayandırılması barədə rəsmi məlumat verməyib. Əksinə, maaşların veriləcəyi ilə bağlı davamlı vədlər verilib. Nəticədə həndbolçular artıq yeddi aydır ödənişsiz qalıb və normal məşq prosesi də yoxdur.
“Bizi daim əmin edirdilər ki, hər şey yaxşı olacaq, maaş “sabah”, “gələn həftə” veriləcək... Hətta ödənişləri rəsmi şəkildə almaq üçün VÖEN açdıq, bank hesabları və kartlar əldə etdik. Nəticədə bu hesablara yalnız fevral ayının maaşı köçürüldü, bundan sonra isə heç bir ödəniş olmadı. Tədricən federasiyanın normal fəaliyyəti də dayandı. Mart və aprel aylarında hələ məşq edirdik, çünki vəziyyətin həqiqətən dəyişəcəyinə ümid edirdik. Lakin daha sonra məşqləri dayandırmaq məcburiyyətində qaldıq. Çünki borca görə zalda işıqları yandırmırdılar, daha sonra isə arenanı ümumiyyətlə bağladılar və bizi hətta trenajor zalına da buraxmadılar. O zaman vəziyyətin həll olunmadığı artıq tam aydın oldu”, - deyə Həsənova bildirib.
Onun sözlərinə görə, idmançılar dolanışıqlarını təmin etmək üçün başqa sahələrdə iş axtarmaq məcburiyyətində qalıblar:
“Mən də bütün həyatımı həndbola həsr etməyimə baxmayaraq, idman sahəsindən kənarda işləməyə məcbur oldum. Bu hadisələr maddi baxımdan mənə, eləcə də təkcə mənə deyil, hamımıza çox ciddi təsir etdi. Hər şey o qədər qəfil və gözlənilmədən baş verdi ki... Hər birimizin kreditləri, məcburi xərcləri və digər zəruri ödənişləri var. Biz maaşımıza güvənirdik. Ödənişlər qəfil dayandırıldıqda isə bu, bizi çox ağır maliyyə vəziyyətinə saldı.
Komanda yoldaşlarımızın heç də hamısı iş tapa bilmədi. Hazırda, xüsusən də bütün peşəkar həyatını idmana, həndbola həsr etdikdə, uyğun iş tapmaq çətindir. Buna görə bəzi oyunçular tamamilə başqa sahələrə getməyə məcbur oldular. Kimlərsə hələ də qazanc mənbəyi axtarır və maddi çətinlik çəkir”.
Buna baxmayaraq, Azərbaycan millisinin həndbolçusu karyerasını başa vurmağı düşünmür. O, fiziki formasını qorumaq, oyun ritmini və illər ərzində topladığı təcrübəni itirməmək üçün məşqlərini davam etdirir. Lakin artıq buna əvvəlki qədər vaxt ayıra bilmir.
“Karyeramızı başa vurmağı düşünmürük və həndbolu atmaq fikrimiz yoxdur. Təkcə mən deyil, hamımız sevdiyimiz idman növü ilə məşğul olmağa davam etməyə hazırıq. Axı biz həndbola uzun illərimizi həsr etmişik. Bu, bizim üçün sadəcə iş deyil, sevdiyimiz məşğuliyyət və həyatımızın bir hissəsidir. İnanırıq və bilirik ki, hər şey düzələcək. Biz yenidən bu zala qayıdacağıq, məşq edəcəyik, oynayacağıq, qalib gələcəyik və Azərbaycan bayrağını qürurla yüksəldəcəyik”, – deyə həndbolçu bildirib.
Azaliya Həsənova qeyd edib ki, federasiyanın rəhbərliyi dəyişməsə və qurum fəaliyyətini tam şəkildə bərpa etsə belə, idmançılar həndbola yalnız öz şərtləri ilə qayıdacaqlar:
“Baş verənlərdən sonra oyunçuların, təbii ki, öz şərtləri və tələbləri olacaq. Bizim üçün sabit maaşların, normal məşq şəraitinin, təlim-məşq toplanışlarının, səfərlərin və belə bir vəziyyətin bir daha təkrarlanmayacağına əminliyin olması vacibdir”.
İdmançıların belə qəti mövqeyi onunla bağlıdır ki, Azərbaycanda həndbol uzun illər ərzində mütəmadi olaraq çətinliklərlə üzləşib. Son aylarda baş verənlər isə bütün bunların son nöqtəsi olub.
“Problemlər çox olub. Bəzən hətta ən zəruri şeylər belə çatışmırdı: vitaminlər, dərmanlar, idman geyimləri və tam hazırlıq üçün lazımi şərait. Ümumilikdə təşkilati məsələlərdə də problemlər var idi. Buraya komandanın təminatı, təlim-məşq toplanışları və səfərlər də daxildir. Dekabr ayında heç bir səbəb göstərilmədən “Azəryol” klubunun heyətinin, demək olar ki, yarısı komandadan uzaqlaşdırıldı. Əsasən aparıcı və təcrübəli oyunçular göndərildi. Yanvar ayından etibarən komandada cəmi 10-a yaxın oyunçu qaldı”, – deyə həndbolçu bildirib.
Həsənovanın sözlərinə görə, federasiyanın rəhbərliyində kimin olmasından asılı olmayaraq, idmançılar ilk növbədə onlara layiqli münasibət göstərilməsini və sistemdə dəyişikliklərin baş verməsini gözləyirlər:
“Rəhbərlik dəyişəcəyi təqdirdə ilk növbədə dəstək, idmançılara hörmət, sabitlik və öz gücümüzə inam görmək istərdik. Məşq və yarışlar üçün layiqli şərait yaratmaq, oyunçuların əməyinə qiymət vermək, həmçinin gəncləri inkişaf etdirmək, onların böyüməsinə və ölkəmizi təmsil etməsinə imkan yaratmaq vacibdir.
Hazırda Azərbaycanda həndbolun gələcəyi barədə danışmaq çətindir. Amma biz dəyişikliklərə ümid edir və inanırıq ki, həndbol yenidən inkişaf edəcək və çiçəklənəcək. İstərdik ki, yeni nəsil də bu idman növünü eyni dərəcədə sevsin, oynamağa və Azərbaycanı qürurla təmsil etməyə can atsın”.
