“Maklaren” pilotu Lando Norris F1 Las-Veqas Qran-prisinin ikinci sərbəst yürüşündə ən yaxşı vaxtı göstərib.
İdman.Biz xəbər verir ki, britaniyalı sürücü 1:33.602 nəticə ilə cədvəlin zirvəsində yer alıb və “Mersedes”in yüksəlişdə olan pilotu Kimi Antonellini 0,029 saniyə qabaqlayıb.
Bununla belə, nəticələrin obyektivliyi sual altındadır, çünki nə Maks Verstappen, nə Oskar Piastri, nə də “Ferrari” pilotları yumşaq təkərlərlə sürətli dövrə vura bilməyiblər.
Sessiya 20 dəqiqə qalmış tras kənarındakı marşalın Turn 17 ətrafında lyuk qapağının boş ola biləcəyini bildirməsindən sonra qırmızı bayraqla dayandırılıb. Nəzarət kameraları ilə təsdiq alınmadığı üçün bütün bolidlər pit-laynda toplanandan sonra mütəxəssislər həmin nöqtəyə göndərilib.
Yoxlamalardan sonra sessiya 6 dəqiqəlik fasilə ilə bərpa edilsə də, bolidlər trasa çıxan kimi yenə qırmızı bayraq qaldırılıb. Vaxtın azlığı səbəbindən bu dayandırma sessiyanın faktiki sonu olub.
FIA açıqlamasında bildirilib ki, sessiya yenidən başladıqda trasda yoxlamanı davam etdirən nəzarət komissiyasının əməkdaşları mövqelərində qalıblarmış.
