Bu gün futbol üzrə Misli Premyer Liqasında səkkizinci tura start veriləcək.
İdman.Biz xəbər verir ki, turun açılış oyununda “Şamaxı” doğma meydanda “Şəfa”nı qəbul edəcək. Şamaxı şəhər stadionunda keçiriləcək qarşılaşma saat 15:00-da başlayacaq.
Görüşün baş hakimi Rəvan Həmzəzadə olacaq. Ona Şirmamed Mamedov və Teymur Teymurov kömək edəcəklər. Dördüncü hakim funksiyasını Səbuhi Bayramov yerinə yetirəcək. VAR sisteminə Elvin Bayramov, AVAR-a isə Tərlan Talıbzadə cavabdeh olacaq. Hakim-inspektor Feyzulla Feyzullayev, AFFA nümayəndəsi isə Elgiz Abbasov olacaq.
Komandalar Azərbaycan Premyer Liqasında ilk dəfə qarşılaşacaqlar. “Şəfa”nın cari mövsümdə elitaya yüksəlməsi səbəbindən tərəflər arasında yüksək liqa səviyyəsində əvvəlki oyunların statistikası yoxdur.
“Şamaxı” geridə qalan yeddi turda 10 xal toplayaraq turnir cədvəlinin yeddinci pilləsində qərarlaşıb. Azər Bağırovun komandası son beş çempionat oyununda məğlubiyyətlə üzləşməyib.
“Şəfa” isə yeddi oyunda cəmi üç xal qazanıb və 11-ci yerdədir. Paytaxt təmsilçisi mövsümdə bir qələbə qazanıb, altı dəfə məğlub olub.
