“Mançester Siti” futbol klubu İngiltərə Premyer Liqasının (İPL) maliyyə qaydalarının pozulması ilə bağlı müstəqil komissiyanın qərarından apellyasiya verib.
İdman.Biz xəbər verir ki, klubun saytında yayılan açıqlamada apellyasiya müraciətinin komissiyanın qərarı ilə bağlı olduğu bildirilib.
Çərşənbə axşamı İPL-in mətbuat xidməti “Mançester Siti”nin liqanın maliyyə qaydalarının pozulması ilə bağlı bütün ittihamlar üzrə, həmçinin klubun istintaqla əməkdaşlıq etməkdən imtina etməsi ilə bağlı ittihamların əksəriyyəti üzrə təqsirli bilindiyini açıqlayıb.
“Mançester Siti” isə qərardan genişmiqyaslı apellyasiya şikayəti verdiyini bildirib.
Klubun açıqlamasında deyilir:
“Mançester Siti Premyer Liqanın intizam işi üzrə komissiyasının qərarından hərtərəfli apellyasiya şikayəti verib. Klub qəti şəkildə hesab edir ki, bu qərarda hüquq, prinsiplər və faktlarla bağlı açıq-aşkar ciddi səhvlər var və qərar bir çox əsaslara görə əsassızdır.
Klub Premyer Liqanın onu ittiham etdiyi əməllərdə günahkar deyil və bu işlə bağlı bütün mövqelərimizi dəstəkləyən çoxsaylı təkzibedilməz sübutlar mövcuddur”.
“Mançester Siti” ilə bağlı araşdırma 2018-ci ildə Almaniyanın “Der Spiegel” qəzetinin klubun ehtimal olunan maliyyə sənədlərini dərc etməsindən sonra başlayıb. İPL “Mançester Siti”ni maliyyə məlumatlarını, həmçinin futbolçulara və məşqçilərə edilən ödənişlərlə bağlı məlumatları düzgün təqdim etməməkdə, eləcə də UEFA-nın maliyyə feyr-pley qaydalarını pozmaqda ittiham edib. Sonradan araşdırma müstəqil komissiyanın baxışına verilib.
“Mançester Siti” 2008-ci ildən BƏƏ-nin “Abu Dhabi United Group” şirkətinə məxsusdur. Həmin vaxtdan etibarən klub 8 dəfə APL-in, 4 dəfə İngiltərə Kubokunun qalibi olub, 7 Liqa Kuboku qazanıb. Həmçinin 2022/23 mövsümündə UEFA Çempionlar Liqasının qalibi olub.
