Atıcılıq üzrə Çin komandası Bakıda keçirilən dünya çempionatında liderliyini davam etdirir.
İdman.biz-in məlumatına görə, Çin idmançıları ümumi hesabda birinci yeri tutmaqda davam edirlər. Onların 15 qızıl, 7 gümüş və 6 bürünc mükafatı var. Hindistan komandası ikinci sırada qərarlaşıb (6-0-8), ABŞ üçüncüdür (5-2-2).
Eyni zamanda, Azərbaycan komandası ilk onluğun astanasındadır və 11-ci yerdədir. Komandamızın bir qızıl və iki gümüş medalı var.
Xatırladaq ki, Nigar Nəsirova çempion (25 metr məsafəyə mərkəzi atəşli tapançadan atəş), Nərminə Səmədova eyni növdə gümüş medal qazanıb. Həmçinin, Nəsirova, Səmədova və Zeynəb Sultanova kiçik çaplı tapançadan 25 metr məsafəyə atəş açmada komanda turnirində ikinci olublar.
Nicat Zəkiyev
İdman.biz
