UEFA Millətlər Liqasının A Liqasının üçüncü qrupunda ilk tur çərçivəsində İngiltərə və İspaniya milliləri üz-üzə gəlib.
İdman.Biz xəbər verir ki, Londondakı “Uembli” stadionunda keçirilən qarşılaşma İspaniyanın 3:2 hesablı qələbəsi ilə başa çatıb.
İspaniya ikinci dəqiqədə Lamine Yamalın qolu ilə hesabı açıb. İngiltərə 36-cı dəqiqədə Entoni Qordonun qolu ilə tarazlığı bərpa edib, Harri Keynin 40-cı dəqiqədəki qolu isə meydan sahiblərini önə keçirib.
Keyn 54-cü dəqiqədə penaltidən yararlana bilməyib. İngiltərə millisinin hücumçusu Cud Bellingemə qarşı qayda pozuntusundan sonra təyin olunan 11 metrlik cərimə zərbəsini tirə vurub.
İspaniya 60-cı dəqiqədə Aleks Baenanın qolu ilə hesabı bərabərləşdirib. Mikel Oyarzabal 74-cü dəqiqədə fərqlənərək qonaqlara qələbə qazandırıb.
Paralel keçən Çexiya və Xorvatiya millilərinin qarşılaşmasında qonaqlar 2:1 hesablı qələbə qazanıblar. Oyunda hesabı 47-ci dəqiqədə 41 yaşlı Luka Modriç açıb. Veteran yarımmüdafiəçi Xorvatiya millisində 203-cü oyununda fərqlənib.
Çexiya 54-cü dəqiqədə Adam Karabetsin qolu ilə hesabı bərabərləşdirib. Xorvatiya isə 77-ci dəqiqədə Marko Paşaliçin qolu ilə yenidən önə keçib.
Çexiyanın yarımmüdafiəçisi Matey Radostanın 79-cu dəqiqədə vurduğu qol isə VAR müdaxiləsindən sonra oyundan kənar vəziyyət səbəbindən ləğv edilib.
Qrupun ikinci turunda sentyabrın 29-da Çexiya İngiltərəni qəbul edəcək, Xorvatiya isə səfərdə İspaniya ilə qarşılaşacaq.
Günün digər qarşılaşmalarında İsveçrə Şimali Makedoniyanı 3:0 hesabı ilə məğlub edib. Remo Froyler 22-ci dəqiqədə hesabı açıb, Zeki Amduni isə 41-ci və 74-cü dəqiqələrdə fərqlənərək dubl edib.
C Liqasının birinci qrupunda isə Albaniya Belarus üzərində 2:0 hesablı qələbə qazanıb. Kristyan Asllani 34-cü dəqiqədə penaltidən hesabı açıb, Ernest Muçi ilk hissənin əlavə vaxtında fərqi artırıb.
Bu qarşılaşma Belarus millisinin baş məşqçisi Viktor Qonçarenko üçün ilk rəsmi oyun olub. Onun rəhbərliyi altında komanda bundan əvvəl keçirdiyi dörd yoldaşlıq görüşündə üç qələbə və bir heç-heçə əldə edib.
C Liqasının üçüncü qrupunda Slovakiya Moldovanı iki cavabsız qolla məğlub edib. Slovakiya millisinin heyətində qolları İvan Şrants (32-ci dəqiqə) və penalti zərbəsindən fərqlənən Ondrey Duda (40-cı dəqiqə) vurub.
"Neftçi"nin hücumçusu Lyubomir Tupta Slovakiya millisinin heyətində meydana çıxmasa da, "Kəpəz"in futbolçusu Viktor Stina Moldova millisində start heyətdə meydana çıxıb. O, 55-ci dəqiqədə əvəzlənib.
Növbəti turda Slovakiya Qazaxıstanı, Moldova isə Farer adalarını qəbul edəcək.
21:58
Qazaxıstan millisi Millətlər Liqasının ilk turunda Farer Adaları ilə qarşılaşıb.
İdman.Biz xəbər verir ki, görüş 1:1 hesabı ilə başa çatıb.
Farer Adaları 14-cü dəqiqədə Oki Samuelsenin qolu ilə hesabı açıb. Qazaxıstan 26-cı dəqiqədə Temirlan Yerlanovun qolu ilə tarazlığı bərpa edib.
Qazaxıstan millisinin qapısını "Sabah"ın qolkiperi Stas Pokatilov qoruyub və 90 dəqiqə meydanda olub.
Bu nəticədən sonra hər iki komanda C Liqasının üçüncü qrupunda 1 xalla ilk iki pilləni bölüşür.
Finlandiya millisi Millətlər Liqasının ilk turunda səfərdə San-Marinonu 7:0 hesabı ilə məğlub edib.
Qarşılaşmada Yoel Pohyanpalo het-trik edib, Leo Valta dubl müəllifi olub. Adrian Svanbek və Benyamin Kyellman isə hərəyə bir qol vurublar.
San-Marino 51-ci dəqiqədən etibarən azlıqda oynayıb. Hesab 0:4 olarkən Alessandro Qolinuççi meydandan qovulub.
Paralel görüşdə İslandiya və Estoniya 1:1 hesablı heç-heçə edib. Andri Qudyonsen 45-ci dəqiqədə meydan sahiblərini önə keçirib. Estoniya 64-cü dəqiqədə Maksim Paskoçinin qolu ilə hesabı bərabərləşdirib.
52-ci dəqiqədə estoniyalı yarımmüdafiəçi Kevor Palumets penaltidən yararlana bilməyib.
Bolqarıstan və Lüksemburq oyununda isə meydan sahibləri 1:2 hesabı ilə uduzublar.
19:31
Sloveniya milli komandası Millətlər Liqasının qrup mərhələsinin ilk turunda Şotlandiyanı qəbul edib.
İdman.Biz xəbər verir ki, qarşılaşma qolsuz heç-heçə ilə başa çatıb – 0:0.
B Liqasının 1-ci qrupunun digər oyununda Şimali Makedoniya sentyabrın 26-da İsveçrəni qəbul edəcək. Qarşılaşma Bakı vaxtı ilə saat 22:45-də başlayacaq.
Növbəti turda Sloveniya evdə Şimali Makedoniya ilə, Şotlandiya isə İsveçrə ilə qarşılaşacaq. Hər iki oyun sentyabrın 29-da keçiriləcək.
11:12
Bu gün, sentyabrın 26-da UEFA Millətlər Liqasının ilk turunun növbəti oyunları keçiriləcək.
İdman.Biz xəbər verir ki, günün əsas qarşılaşması Bakı vaxtı ilə 22:45-də başlayacaq.
A Liqasının 1-ci qrupunda İngiltərə millisi doğma meydanda İspaniyanı qəbul edəcək.
Eyni saatda Çexiya Xorvatiya ilə qarşılaşacaq.
UEFA Millətlər Liqası
1-ci tur
A Liqası
1-ci qrup
22:45 – Çexiya – Xorvatiya
22:45 – İngiltərə – İspaniya
B Liqası
2-ci qrup
17:00 – Sloveniya – Şotlandiya
22:45 – Şimali Makedoniya – İsveçrə
C Liqası
1-ci qrup
20:00 – Bolqarıstan – Lüksemburq
20:00 – Farer adaları – Qazaxıstan
2-ci qrup
20:00 – İslandiya – Estoniya
20:00 – San Marino – Finlandiya
22:45 – Albaniya – Belarus
3-cü qrup
22:45 – Slovakiya – Moldova
