UFC britaniyalı MMA döyüşçüsü Maykl “Venom” Peyclə (MVP) müqaviləni yeniləməyib.
İdman.Biz xəbər verir ki, 39 yaşlı idmançı UFC ilə mövcud müqaviləsi üzrə son döyüşünü sentyabrın 5-də Parisdə keçirib. O, Nursulton Ruziboyevə qarşı qarşılaşmada hakimlərin yekdil qərarı ilə qalib gəlib.
Buna baxmayaraq, UFC Peyclə yeni müqavilə bağlamayıb. Təşkilatın reytinq səsverməsində iştirak edən jurnalist Con Morqan sentyabrın 7-də UFC-dən aldığı bildirişi yayımlayıb.
Bildirişdə Peycin dərhal qüvvəyə minməklə UFC reytinqinə daxil edilmək hüququndan çıxarıldığı qeyd olunub. Orta çəkidə onu artıq sıralamaya daxil edən səsvermə iştirakçılarından siyahını yenidən tərtib etmək istənilib.
Peyc Parisdəki görüşdən əvvəl bunun UFC ilə hazırkı müqaviləsinin son döyüşü olduğunu açıqlayıb. Döyüşdən sonra isə təşkilatda qalmaq istədiyini gizlətməyib.
“Onlar əvvəllər məndən razı deyildilər. İndi də razı qalmayacaqlar. Mən titul uğrunda mübarizə aparmaq, irəliləmək və bu təşkilatda qalmaq istəyirəm”, - Peyc bildirib.
Britaniyalı döyüşçü son çıxışının da UFC rəhbərliyini razı salmaya biləcəyini etiraf edib:
“Əgər özümü onların yerinə qoysam, belə düşünərdim: onunla yenidən müqavilə bağlaya bilərik, amma daha artığını görəcəyikmi?”
Peyc UFC-də altı döyüş keçirib və onların beşində qalib gəlib. Onun yeganə məğlubiyyəti İan Maçado Qarri ilə qarşılaşmada qeydə alınıb. Buna baxmayaraq, UFC-də qazandığı beş qələbənin hamısı hakimlərin qərarı ilə olub.
MVP “Bellator”da çıxış etdiyi dövrdə möhtəşəm nokautları və qeyri-adi döyüş üslubu ilə tanınıb. UFC-də isə altı görüşün heç birini vaxtından əvvəl başa çatdıra bilməyib.
