Azərbaycan cüdoçusu Rəşid Məmmədəliyev Budapeştdə keçirilən “Böyük Dəbilqə” turnirində qızıl medal qazanmasını şərh edib.
İdman.Biz xəbər verir ki, 73 kq çəki dərəcəsinin finalında Məmmədəliyevin rəqibi 18 yaşlı İsveç təmsilçisi Narek Vardanyan olub. Turnir öncəsi dünya reytinqində yeddinci pillədə qərarlaşan cüdoçumuz görüşün əvvəlindən rəqibinə təzyiq göstərib və onu iki xəbərdarlıq almağa məcbur edib. Qarşılaşmanın bitməsinə 30 saniyə qalmış Məmmədəliyev seoi-otoşi fəndini yerinə yetirərək ipponla qalib gəlib.
“Budapeştdə qalib gəldiyim üçün çox xoşbəxtəm. Məşqçilər və tibbi heyətlə birlikdə böyük iş görmüşük. Uşaqlara avtoqraf vermək də mənim üçün vacibdir, çünki özüm uşaq olanda məşhur cüdoçulardan avtoqraf almaq istəyirdim. Arenadakı ab-hava çox xoşuma gəldi”, - deyə Məmmədəliyev Beynəlxalq Cüdo Federasiyasının saytına açıqlamasında bildirib.
O, karyerasında ilk dəfə bir turnir çərçivəsində altı görüş keçirdiyini vurğulayıb:
“Hər raund əsl döyüş idi. Finalda bilirdim ki, isveçli cüdoçu ayaqlarla yaxşı işləyir. Buna görə də ona hücum üçün imkan verməməyə çalışırdım”.
Məmmədəliyev Bakıda keçiriləcək dünya çempionatı barədə də danışıb:
“Bakıdakı dünya çempionatından əvvəl əsas vəzifəm ciddi məşq etmək və zədədən yayınmaqdır. Amma sabah qızıl medalı qeyd etməyə vaxtım olacaq”.
Qeyd edək ki, Məmmədəliyev 2025-ci ildə Avropa çempionatında bürünc, Bakı “Böyük Dəbilqə”sində gümüş, Parisdə analoji turnirdə isə bürünc medal qazanıb. O, 2026-cı ildə Düşənbədə keçirilən “Böyük Dəbilqə”də də üçüncü olub.
