Macarıstanın paytaxtı Budapeştdə keçirilən cüdo üzrə “Böyük Dəbilqə” turnirinə bu gün yekun vurulacaq.
İdman.Biz xəbər verir ki, yarışın son günündə Azərbaycanın beş təmsilçisi tatamiyə çıxacaq.
90 kq çəki dərəcəsində mübarizə aparan Vüqar Talıbov ilk raunddan azaddır. 100 kq-da çıxış edən Əjdər Bağırov da mübarizəyə ikinci mərhələdən başlayacaq.
+100 kq çəki dərəcəsində Camal Qamzatxanov ilk görüşündə serbiyalı İqor Vraçarla, Kənan Nəsibov isə rusiyalı Artyom Zolotuxinlə qarşılaşacaq.
Qadınların yarışında +78 kq çəki dərəcəsində çıxış edən Mədinə Qaysınova ilk görüşünü Belçika təmsilçisi Qabriel Buyve ilə keçirəcək.
Qeyd edək ki, iki yarış günündən sonra Azərbaycan millisinin aktivində iki medal var. Rəşid Məmmədəliyev (73 kq) qızıl medal qazanıb, Vüsal Qalandarzadə (81 kq) isə bürünc mükafata sahib çıxıb.
