“Bəziləri hakimin rəqibin penaltisini vermədiyini deyir. O barədə heç nə deyə bilmərəm. Amma İqor Ribeyroya göstərilən qırmızı vərəqə təmiz idi. Əliyar Ağayev orada düzgün qərar verdi”.
İdman.biz xəbər verir ki, bunu Futbolinfo.az-a açıqlamasında “Turan Tovuz”un futbolçusu Ayxan Hüseynov deyib.
25 yaşlı yarımmüdafiəçi Misli Premyer Liqasının 3-cü turunda səfərdə “Neftçi” üzərində 1:0 hesablı qələbə qazandıqları matçdan danışıb: “Bilirdik ki, həmişəki kimi bizi “Neftçi”yə qarşı ağır, emosional oyun gözləyir. Çətin alındı. Stadiondakı atmosfer, meydan ağır idi. Çalışmışdıq ki, matça maksimum yaxşı hazırlaşaq. “Neftçi” də bizə qarşı yaxşı mübarizə apardı. Sadəcə, qol epizodlarından düzgün yararlana bilmədilər. Belə oyunlarda epizodlardan kim düzgün istifadə edirsə, oyunu da o aparır”.
Bir il əvvəl Azərbaycan pasportu alan Hüseynov yığmanın baş məşqçisi Fernandu Santuş tərəfindən Ukrayna və Sloveniya ilə matçlara dəvət olunmamasına da münasibət bildirib: “O barədə nəsə deyə bilmərəm. Hər oyunçu millidə oynamaq istəyir. Amma kimi çağırırlar, kimi də yox. Məşqçinin öz fikirləri, futbola öz baxışı var. Çağırsaydılar, super olardı, çağırmadılar, yenə eyni motivasiya ilə davam edəcəyəm. Üzərimdə işləyib, daha yaxşı formaya düşərək “Turan Tovuz”a kömək etməyə çalışacam”.
