“Mançester Siti”nin sabiq futbolçusu Colion Leskott 2011-ci ildə Karlos Teveslə komandanın o vaxtkı baş məşqçisi Roberto Mançini arasında yaşanan qalmaqalla bağlı yeni təfərrüatları açıqlayıb.
İdman.Biz TNT Sports-a istinadən xəbər verir ki, keçmiş futbolçu Tevesin həmin vaxt meydana çıxmaqdan imtina etməsi barədə yayılan məlumatların həqiqəti əks etdirmədiyini söyləyib.
Leskott isə hadisənin əslində fərqli cərəyan etdiyini vurğulayıb:
“Bu hadisə bizə təsir etmədi. Əslində baş verənlər düzgün işıqlandırılmamışdı. Reallıq deyilənlərdən tamamilə fərqli idi.
Əlbəttə, çünki o, meydana çıxmaqdan imtina etməmişdi. Halbuki məhz belə təqdim olunmuşdu.
Hamı onun oyuna daxil olmaqdan imtina etdiyini deyirdi. Amma belə deyildi. O, ‘Mən isinmişəm, oynamağa hazıram, məni meydana buraxın’, – demişdi.
Daha sonra soyunub-geyinmə otağında yaranmış hər hansı anlaşılmazlığa və qarışıqlığa görə üzr istədi. Bundan sonra bir neçə aylıq qolf tətilinə yollandı, geri qayıtdıqda isə het-trik etdi”.
Leskottla birlikdə hadisəni xatırlayan “Mançester Siti”nin digər sabiq futbolçusu Ouen Harqrivz də həmin dövrdə komanda yoldaşlarının Tevesə dəstək verdiklərini bildirib:
“Hamı onun arxasında idi, elə deyilmi?”
Hadisə 2011-ci ilin sentyabrında “Mançester Siti”nin Çempionlar Liqasında “Bavariya”ya 0:2 hesabı ilə məğlub olduğu görüşdə baş verib. Həmin vaxt Tevesin isinmə hərəkətlərini yerinə yetirməkdən imtina etdiyi bildirilmiş, Mançini isə argentinalı hücumçunun klubdakı karyerasının başa çatdığını açıqlamışdı.
