Kosovo təmsilçisi “Malişeva”ya keçən Azərbaycan millisinin qapıçısı Yusif İmanovun AZƏRTAC-a müsahibəsi:
– Kosovo klubuna keçidiniz necə baş tutdu?
– Bu transfer müqavilə əsasında oyunçusu olduğum agentlik vasitəsilə həyata keçirildi. Müəyyən variantlar oldu, biz onları dəyərləndirdik və sonda “Malişeva” ilə razılığa gəldik. Mənim üçün əsas olan düzgün seçim idi. Təbii ki, seçim edərkən gələcək karyeram və inkişaf perspektivi ön planda idi.
– Maraqlıdır, niyə məhz Kosovo çempionatı? Yerli və başqa xarici klublardan sizinlə maraqlanan oldu?
– Düzünü desəm, yerli klublardan yalnız biri mənimlə maraqlandı, digərlərindən isə konkret maraq olmadı. Amma mənim üçün ən vacib məqam oyun praktikası əldə etmək və inkişaf üçün şəraitin yaradılması idi. “Malişeva” rəhbərliyi mənə inam göstərdi və məhz bu münasibət qərarımda əsas rol oynadı. Bu transferi karyeramda Avropaya açılan qapı kimi dəyərləndirirəm.
– Kosovo çempionatı elə də inkişaf etməyib. Oraya getməklə karyeranızda geri addım atdığınızı düşünmürsünüz?
– Mən bunu geri yox, irəliyə atılmış addım hesab edirəm. Burada əsas məqsədim oyun praktikasını artırmaq, fərqli mühitdə özümü sınamaq və Avropa futboluna adaptasiya olmaqdır. Bəli, bəlkə də daha güclü liqalar var, amma futbolçu üçün əsas inkişafdır. Mən bu addımı karyeramda yeni mərhələ kimi görürəm.
– Bu keçid sizi milli komandanın məşqçilər korpusunun diqqətindən yayındıra bilər?
– Mən belə düşünmürəm. Futbolçunu ön plana çıxaran əsas amil stabil oyun və performansdır. Əgər mən burada yaxşı çıxış etsəm, milli komandanın məşqçilərinin diqqətindən yayınmayacağam. Əksinə, bu addım mənim üçün özümü sübut etmək və yenidən milli komandada yer almaq üçün motivasiya rolunu oynayır.
– Azərbaycan millisi sentyabrda DÇ-2026-nın seçmə mərhələsi çərçivəsində İslandiya və Ukrayna yığmaları ilə qarşılaşacaq. Şansları necə qiymətləndirirsiniz?
– Çox güclü rəqiblərdir, hər ikisinin futbol ənənəsi var. Amma futbol sürprizlərə açıq oyundur. Əgər komanda sona qədər mübarizə aparsa və öz gücünə inansa, xal qazanmaq mümkündür. Mən də bir futbolçu olaraq millimizdən bunu gözləyirəm. Əsas odur ki, meydanda öz gücümüzü tam göstərək.
– Milli komandanın üzvü olaraq, “Qarabağ”ın Çempionlar Liqasının Liqa mərhələsindəki şanslarını necə dəyərləndirirsiniz?
– “Qarabağ” artıq illərdir Avropada özünü sübut edib. Təcrübəli komandadır, dəfələrlə böyük turnirlərdə uğurla çıxış edib. Mən inanıram ki, bu dəfə də layiqli mübarizə göstərəcəklər və azarkeşlərimizi sevindirəcəklər. Bir futbolçu olaraq mən də “Qarabağ”ın uğurları ilə qürur duyuram və onlara yalnız uğurlar arzulayıram.
İdman.biz
