“Çox keyfiyyətli komandaya qarşı oynayacağıq. Bu matç bizim üçün vacibdir”.
İdman.biz xəbər verir ki, bunu "Qarabağ"ın baş məşqçisi Qurban Qurbanov UEFA Avropa Liqasının Liqa mərhələsinin 5-ci turunda Bakıda "Lion"la (Fransa) oyundan əvvəl keçirilən mətbuat konfransında bildirib.
52 yaşlı mütəxəssis bildirib ki, hədəfləri azarkeşləri sevindirməkdir: “Demək olar ki, oyuna pis hazırlaşmamışıq. Çox istərdik ki, azarkeşlərimizi sevindirək və uğurlu nəticə əldə edək. Bu görüş bizim üçün böyük əhəmiyyət daşıyır. Ona görə də qalib gəlmək üçün əlimizdən gələni etməyə çalışacağıq”.
- Marko Veşoviç və Mateus Silvanın hazırlığı necədir? Sabahkı oyunda ilk dəqiqələrdən meydana çıxa biləcəklər?
- Hər iki futbolçunun hazırlığı yaxşı səviyyədədir. Bu gün və sabah tam qəti qərar verəcəyik ki, onlar əsas heyətdə olacaq, ya yox. Ümumi hazırlıqlarından razıyam.
- "Lion" klubu hazırda maddi və mənəvi cəhətdən çökmüş komandadır. Bu məqamlar sizin qələbə qazanmaq imkanlarınızı artırırmı?
- Oyunlarını təhlil etmişik. Heyətləri ilə maraqlanmışıq. Öz heyətimiz də bəllidir. Sadəcə 1-2 sual doğuran mövqe var. Rəqibə gəldikdə, böhran oldu və ya olmadı, biz qələbə üçün hazırlaşırıq. İstənilən rəqibə qarşı belədir. Bunlar hamısı söz-söhbətlərdir. Hər il istənilən böyük klubda belə söz-söhbətlər gəzir. Belə hallarda onlar 1-2 oyunçusunu başqa kluba satır, problemi həll edirlər. Oyunçularının dəyəri yüksəkdir. Bugünkü matça belə fikirlərlə yanaşmaq doğru olmaz. Məğlub olanda fikirlər səslənir ki, belə problemi olan kluba qalib gələ bilmədilər. "Lion" illərin klubudur. Bu kimi problemlər sadəcə söz-söhbətdir.
- Rəqibin "Lion" olduğunu nəzərə alsaq, hansısa xüsusi gedişat nəzərdə tutmusunuzmu?
- Biz həmişə çalışmışıq ki, öz oyunumuzu yaxşılaşdıraq. İlk silahımız bu olmalıdır. Öz bacardığımızı daha keyfiyyətli şəkildə yerinə yetirməyə çalışacağıq. Amma istənilən rəqibin üstün cəhətlərinin qarşısını almalıyıq. Hər komandanın üstün cəhətləri var. Sadəcə bir neçə element var ki, digər rəqiblərə qarşı necədirsə, bu rəqibə qarşı da o detallarda diqqətli olmalıyıq. "Lion"un üstün keyfiyyətini nəzərə alaraq, detallara fikir verməliyik. Hücum planımızda da çox yox, 1-2 əlavə düşüncələr olacaq. Həyata keçəcək, ya yox, oyunun gedişatından asılıdır. Hazırlığın çox hissəsini öz oyunumuzun üzərində qururuq.
- Sizcə, "Lion"u hansı xüsusi keyfiyyətlərə görə təəccübləndirə biləcəksiniz?
- Rəqib haqda çox məlumat verməyi xoşlamıram. Sadəcə futbolçularıma məlumat verirəm. Bayaq da dediyim kimi, çox keyfiyyətli komandaya qarşı oynayacağıq. Bizim ən böyük gücümüz kollektiv oyuna üstünlük verməyimizdir. Çünki bu gün komponentlərə baxsaq, "Lion" bizdən üstün görünür. Daha yaxşı liqada oynayır, daha böyük klubdur. Ancaq bizim də Avropada böyük təcrübəmiz var. Kollektiv şəkildə çalışacağıq ki, lazım olan nəticə üçün meydanda ən doğrusunu edək.
Qeyd edək ki, noyabrın 28-də Tofiq Bəhramov adına Respublika Stadionunda təşkil ediləcək "Qarabağ" - "Lion" görüşü saat 21:45-də start götürəcək.
Aytac Sahəd
İdman.biz
