"Qarabağ"ın futbolçusu Maksim Medvedev karyerasını bitirəcək.
İdman.biz xəbər verir ki, 35 yaşlı futbolçu bu gün Azərbaycan kubokunun finalında sonuncu dəfə komandanın formasını geyinəcək.
Maksim yetirməsi olduğu klubun əsas komandasında 2006/07 mövsümündə debüt edib. Müdafiəçi bunadək uzun illər "Qarabağ"ın aşağı yaş komandaları və əvəzedici heyətində çıxış edib.
18 il əsas komandanın formasını daşıyan Medvedev bu müddətdə 552 oyun keçirib. O, təkcə "Qarabağ"da deyil, Azərbaycan futbol tarixində eyni klubda ən çox matça çıxan oyunçudur. Müdafiəçi bu müddətdə 17 qola imza atıb.
Maksim Premyer Liqada 376 görüşdə 12 qola sevinib. O, çempionatda eyni komandada ən çox oyun keçirən futbolçu kimi rekordçudur. Medvedev ölkə kubokunun 50 matçında 2 dəfə fərqlənib.
Müdafiəçi avrokuboklarda ən çox oyun keçirən Azərbaycan futbolçusudur. O, 126 qarşılaşmada 3 qol vurub.
Maksim eyni klubla 10 dəfə Azərbaycan çempionu olan üç futbolçudan biridir. Müdafiəçi eyni klubda hamıdan çox – 14 mükafat qazanan futbolçudur. Onun hesabında Premyer Liqanın 10 qızıl, 2 gümüş və 2 bürünc medalı var.
Azərbaycan kubokunun bu gün "Zirə"yə qarşı keçirilən həlledici matçı Maksimin 6-cı finalıdır. O, kubokun 5 qat qalibi olmaqla bu göstəricidə ölkə rekordunun şərikidir. 6-cı kubok əldə olunsa, futbolçu yeni rekordun müəllifi kimi tarixə düşəcək.
Karyerası ərzində yalnız bir klubda çıxış edən müdafiəçi Azərbaycan millisinin də şərəfini qoruyub. O, əsas yığmada 81 dəfə şans qazanıb. Bu göstəricidə yalnız "Qarabağ"ın sabiq kapitanı Rəşad Sadıqovdan geri qalan Maksim millidə ikinci nəticəyə malikdir. O, yığmada 4 qola sevinib. Medvedev əsas yığmaya qədər aşağı yaş qrupları üzrə milli komandaların formasını da geyinib.
Oyundan əvvəl komandanın kapitanı mükafatlandırılıb. "Qarabağ"ın rəhbərliyi ona klubda keçirdiyi oyun sayına (552) uyğun olaraq xatirə forması təqdim edib.
Qeyd edək ki, 2006-cı ildən "Qarabağ"ın formasını geyinən Maksim 10 dəfə Azərbaycan çempionu olub.
İdman.biz
