AFFA-nın İcraiyyə Komitəsinin üzvü Mahir Məmmədov qurumdan ayrılacaq.
İdman.biz xəbər verir ki, bunu eyni zamanda Azərbaycan Şahmat Federasiyasının prezidenti olan funksionerin özü açıqlayıb.
Məmmədov jurnalistlərə açıqlamasında bildirib ki, AFFA-nın Hesabat-Seçki Konfransında seçiləcək İcraiyyə Komitəsinin yeni heyətində yer almaq niyyətində deyil: “Azərbaycan şahmatının səviyyəsinin, dövlət tərəfindən qoyulan vəzifələrin və qarşımızda duran işlərin mühümlüyünü nəzərə alaraq, o cümlədən doğrudan da şahmatın yükünün artması, istedadların inkişaf etməsi, bütün bunlar mənə əminlik verir ki, gələcəkdə bütün ictimai işimi şahmata yönəldim. Ona görə istərdim ki, AFFA-nın yeni heyətində olmayım. Hətta köhnələrdən kimlərsə seçilsə də, heyət istənilən halda yeni olacaq. Mənim birmənalı şəkildə getmək fikrim var”.
Qeyd edək ki, AFFA-nın Hesabat-Seçki Konfransının martda keçiriləcəyi gözlənilir.
İdman.biz
