Elnur Məmmədli “Sumqayıt”ın Müşahidə Şurasının sədri seçilib - FOTO

Xəbərlər
1 Dekabr 2023 18:40
Elnur Məmmədli “Sumqayıt”ın Müşahidə Şurasının sədri seçilib - FOTO

“Sumqayıt” Futbol Klubunun Müşahidə Şurasının iclası keçirilib.

Klubdan İdman.bizə verilən məlumata görə, Azərkimya İstehsalat Birliyinin inzibati binasında keçirilən iclası Müşahidə Şurasının (MŞ) sədri Abdulla Məmmədov açıb.

O, gündəlikdə duran məsələlərlə bağlı toplantı iştirakçılarına məlumat verdikdən sonra klub prezidenti Riad Rəfiyev “Sumqayıt” Futbol Klubunun ötən təqvim ilindəki fəaliyyəti ilə bağlı hesabatı təqdim edib.

Ardınca Abdulla Məmmədov şəxsi işləri ilə əlaqədar MŞ-da təmsil olunmaq istəməyən Azərkimya İB-nin Həmkarlar İttifaqının sədri Aydın Xəlilov və keçmiş baş direktoru İmran Arzumanzadənin əvəzinə Birliyin baş direktoru Elnur Məmmədli və SOCAR-ın Aparat rəhbərinin müavini Ayxan Əliyevin Müşahidə Şurasına qəbul edilməsini təklif edib. Təklif səsə qoyularaq yekdilliklə qəbul olunub.

Daha sonra Abdulla Məmmədov digər işləri ilə əlaqədar Müşahidə Şurasının sədri vəzifəsindən istefa verdiyini, fəaliyyətinə sıravi üzv kimi davam etmək istədiyini, sədr kimi isə Elnur Məmmədlinin namizədliyini təklif etdiyini bildirib. Təklif səsə qoyularaq yekdilliklə qəbul edilib.

Müşahidə Şurasının yeni tərkibi və sədri müəyyənləşdikdən sonra klubun gələcək planları, qarşıdakı hədəflər və görüləcək işlərlə bağlı fikir mübadiləsi aparılıb.

İdman.biz