Son günlər Azərbaycan millisinin sabiq futbolçusu Elmar Baxşıyevin adı “Kəpəz”lə yanaşı hallanır. Təcrübəli mütəxəssisin Gəncə təmsilçisinin baş məşqçi postuna əsas namizədlərdən biri olduğu barədə iddialar gündəmdədir.
İdman.Biz futbolinfo.az-a istinadən xəbər verir ki, 42 yaşlı mütəxəssis yayılan xəbərlərə münasibət bildirərək hazırda heç bir klubla danışıqlar aparmadığını açıqlayıb.
“Mətbuatda yazılanları mən də oxuyuram. Bu günə kimi “Araz-Naxçıvan”dan ayrıldıqdan sonra heç bir klub və nümayəndə ilə görüşüm olmayıb”, - deyə o açıqlamasında söyləyib.
E.Baxşıyev gələcək karyerası ilə bağlı gözləntilərini də gizlətməyib. O, çalışacağı komandanın iddialı və rəqabətqabiliyyətli olmasının vacib olduğunu vurğulayıb:
“İstərdim çalışacağım komanda iddialı və rəqabətə davamlı olsun. Əsasən isə qarşılıqlı və məqsədli iş olmasını istəyirəm”.
Qeyd edək ki, Elmar Baxşıyev son olaraq “Araz-Naxçıvan”ı çalışdırıb. Onun adı son günlər bir sıra Premyer Liqa klubları, xüsusilə də “Kəpəz”lə əlaqələndirilir.
