FIFA prezidenti Canni İnfantinonun vəzifəsində qalacağı ehtimalı güclənsə də, dünya futbolunun idarəetməsində yeni qarşıdurma başlayıb.
İdman.Biz xəbər verir ki, “Reuters”in məlumatına görə, böhranın mərkəzi artıq İnfantinonun istefası deyil, onun FIFA daxilində hansı səlahiyyətləri saxlayacağı məsələsidir. Dünya futbolunun yüksək vəzifəli şəxsləri iki əsas ssenarinin mümkün olduğunu bildirirlər: ya İnfantino müəyyən səlahiyyətlərindən imtina edəcək, ya da FIFA ilə klublar, konfederasiyalar, futbolçu nümayəndələri və milli assosiasiyalar arasında uzunmüddətli qarşıdurma yaranacaq.
Mənbələrdən biri vəziyyəti belə xarakterizə edib: “Aydın olan budur ki, o heç yerə getmir”. Digər yüksək vəzifəli idman funksioneri isə belə bir qarşıdurmanın FIFA daxilində “idarəetmə baxımından vətəndaş müharibəsi” yarada biləcəyini deyib.
İnfantino böhrandan çıxmaq üçün FIFA Şurasına və qurumun 211 üzv assosiasiyasının prezidentlərinə məktub göndərib. O, böyük strateji layihələrlə bağlı FIFA-nın idarəetmə modelinin müstəqil şəkildə yoxlanılmasını, həmçinin qərarvermə mexanizmlərinin gücləndirilməsi üçün konfederasiyalar və federasiyalarla məsləhətləşmələr keçirilməsini təklif edib. İnfantino eyni zamanda FIFA-ya rəhbərlik etməyə davam etmək niyyətində olduğunu vurğulayıb.
Böhranın əsas səbəblərindən biri FIFA-nın kommersiya hüquqlarının, o cümlədən dünya çempionatı ilə bağlı hüquqların 20 faizinin özəl investorlara satılması planı olub. Layihə UEFA, Asiya Futbol Konfederasiyası və CONCACAF-ın etirazından sonra iyulda dayandırılıb.
UEFA prezidenti Aleksander Çeferin də məsələ ilə bağlı sərt mövqe nümayiş etdirib. O bildirib ki, layihə ləğv olunsa da, pozulan etimad hələ bərpa edilməyib:
“İdmanımızda etimad üç sütuna əsaslanır: birlik, şəffaflıq və çoxluğa xidmət edən idarəetmə. Futbol satılmır”.
Mümkün kompromis variantlarından biri FIFA daxilində prezidentin səlahiyyətlərini məhdudlaşdıracaq yeni strukturun yaradılmasıdır. Razılıq əldə olunmasa, klublar Klublararası Dünya Çempionatı, maliyyə bölgüsü və futbolçuların milli komandalara buraxılması məsələlərində FIFA-ya qarşı çıxa, futbolçu nümayəndələri beynəlxalq təqvimə etiraz edə, konfederasiyalar isə turnirlərin genişləndirilməsi planlarını əngəlləyə bilərlər.
İnfantinonun mövqeyi isə böhranın ilk günləri ilə müqayisədə güclənib. Reuters-ə danışan milli assosiasiyalardan birinin prezidenti hesab edir ki, onun rəqibləri ən əlverişli məqamı əldən veriblər. İnfantino qarşıdakı aylarda müxtəlif turnir və konqreslərdə federasiya rəhbərləri ilə görüşərək 2027-ci ilin martında keçiriləcək FIFA prezident seçkisinə qədər dəstəyini möhkəmləndirməyə çalışacaq.
