Ötən noyabr ayında keçirilən məşq zamanı “Real Madrid”in keçmiş baş məşqçisi Xabi Alonso “Los Blancos” oyunçularına qəzəblənərək “Mən burada uşaq bağçasına məşqçilik etmək üçün olduğumu bilmirdim!” deyib.
İdman.Biz bu barədə “Marca”ya istinadən məlumat verir.
Mənbənin məlumatına görə, bu sözlər ispan məşqçinin çarəsizliyindən qaynaqlanıb. O, oyunçuların onun tələblərinə, xüsusən də taktiki tələblərinə əməl etməməsindən narazı qalıb. Alonso “Los Blancos” oyunçularının narazı simalarını və intizamsız münasibətlərini bəyənməyib. Vurğulanır ki, oyunçulara ünvanlanan “uşaq bağçası” ifadəsi məşqçinin “Real Madrid”dəki sonunun başlanğıcı olub.
Alonso ötən yaydan bəri “Real Madrid”in baş məşqçisi olub. Bazar ertəsi, 12 yanvar tarixində Kral Klubu ispan məşqçi ilə tərəfdaşlığının bitdiyini elan edib.
