AMADA tərəfindən antidopinq qaydalarını pozduğuna görə üç illik diskvalifikasiya olunan ağırlıqqaldıran Fazilə İmanova 2026-cı ildə milli komandanın düşərgəsində yer almayıb və yarışlara qatılmayıb.
Azərbaycan Ağırlıqqaldırma Federasiyası idmançının yoxlanılması məsələsinə aydınlıq gətirib.
“Fazilə İmanova bu il yığmaya çağırılmayıb, təlim-məşq toplanışında olmayıb və yarışlarda iştirak etməyib. Amma təbii ki, AMADA yarışda və toplanışda olmayan idmançını da yoxlaya bilir. Bir daha bildiririk ki, idmançıdan nümunə götürülərkən o, yığmanın düşərgəsində olmayıb və yarışda iştirak etməyib”, - deyə federasiyadan report.az-a bildirilib.
Xatırladaq ki, Fazilə İmanovanın nümunəsində anabolik androgenik steroidlər (AAS)/metribolone aşkarlanıb. Onun cəzası 2026-cı il mayın 15-dən qüvvəyə minib. Sanksiyanın müddəti 2029-cu il mayın 14-də başa çatacaq.
