Xəbər verdiyimiz kimi, Bakıda atlıcılıq üzrə 53-cü dünya çempionatı başlayıb.
Beynəlxalq Atıcılıq İdmanı Federasiyasının baş katibi Villi Qrill turnirin əhəmiyyəti barəsində bu cür danışıb:
"Bakıdakı yarış təkcə Azərbaycan yox, həm də dünya idmanı üçün vacib hadisədir. Bu, idmançılar üçün də vacibdir".
Azərbaycan Atıcılıq Federasiyasının baş katibi Emin Cəfərov isə qeyd edib ki, bu yarışda 101 ölkə və 108 atıcılıq federasiyası iştirak edəcək. Ümumilikdə isə dünya çempionatında 1239 idmançı mübarizə aparacaq. Yarış iştirakçalrı 55 növdə öz qüvvələrini sınayaraq qaliblərin adını müəyyənləşdirəcəklər. Bunlardan 10-u stend, qalanı güllə atıcılığı üzrə olacaq. Hazırda turnirlə bağlı müxtəlif ölkələrdən 700-ə yaxın nümayəndə heyəti ölkəmizə təşrif buyurub. Ümumilikdə 2000-dən çox şəxsin yarışda iştirakı gözlənilir. İştirak edəcəkölkələr arasında yalnız Filippin yığması son anda çempionata qatılmaqdan imtina edib. Səbəb kimi isə onlar daxili məsələri göstərib.
Qeyd edək ki, paytaxtımızda keçiriləcək bu dünya çempionatı, Paris-2024 Yay Olimpiya Oyunlarına lisenziya xarakteri daşıyır və ən çox lisenziya məhz burada qazanılacaq. Ümumilikdə 48 lisenziya olacaq. Mundial atıcılıq idmanı üçün xüsusi bayram olacaq.
Baş katib eyni zamanda bu dünya çempionatında yarışlarda qayda dəyişikliyi olmayacağını da vurğulayıb:
"Format əvvəlki kimi qalır. Tokio Olimpiadası ilə müqayisədə hər hansı yeni qayda tətbiq olunmayacaq. Atletlər onları nələrin gözlədiyini bilirlər. Hər şey əvvəlki qaydada keçiriləcək. Heç kiçik dəyişiklik də etməmişik".
Atıcılıq Federasiyasının vitse-prezidenti Zemfira Meftahətdinova isə paytaxtımızda keçiriləcək yarışda iştirak edən Azərbaycan yığması barədə məlumat verib:
"31 idmançımız turnirdə mübarizə aparacaq. Son yarışlarda gənclərimiz çox yaxşı nəticələr göstəriblər. Təcrübəli atıcılarımız da olacaq. İdmançılarımız bütün növlərdə çıxış edəcəklər. Hamısı hazırlaşır, istəyirlər ki, yaxşı nəticə qazansınlar. Hamı kimi, onlar da birinci olmaq arzusundadırlar. Məşqlər üçün hər cür şərait yaradılıb. İnanırıq ki, bacarıqlarını göstərəcəklər".
Bu gündən start götürəcək dünya çempionatı sentyabr ayının 1-nə qədər davam edəcək.
Rüfət Abdullayev
İdman.biz
