Çempionlar Liqasının 2026/27 mövsümünün ümumi mərhələsində daha dörd oyun başa çatıb.
İdman.Biz xəbər verir ki, Bakının “Sabah” klubunun iki rəqibi olan “Napoli” və “Arsenal” bu tur öz aralarında oynayıb.
Bu oyunda “Arsenal” səfərdə rəqibini 1:0 hesabı ilə məğlub edib. Neapoldakı “Dieqo Armando Maradona” stadionunda keçirilən görüşün yeganə qolu 75-ci dəqiqədə vurulub. London təmsilçisinin yarımmüdafiəçisi Martin Edeqor fərqlənərək komandasına qələbə qazandırıb.
Hər iki klub sonradan "Sabah"la qarşılaşacaq. Bakı təmsilçisi 27 yanvar 2027-ci il tarixində "Napoli"ni qəbul edəcək, "Arsenal"la isə səfərdə oynayacaq.
Lissabonda isə “Sportinq” “Qalatasaray”ı 3:1 hesabı ilə üstələyib. Qarşılaşmada hesab 5-ci dəqiqədə açılıb. “Sportinq”in müdafiəçisi Qonsalo İnasiu avtoqola imza ataraq “Qalatasaray”ı önə keçirib. Meydan sahibləri 27-ci dəqiqədə Ceni Katamonun qolu ilə hesabı bərabərləşdirib. Luis Suares 57-ci dəqiqədə penaltidən fərqlənərək “Sportinq”i önə keçirib. Rodriqo Zalasar isə 63-cü dəqiqədə Portuqaliya təmsilçisinin üçüncü qolunu vurub.
“Liverpul” isə doğma meydanda Madrid “Atletiko”suna 2:1 hesabı ilə qalib gəlib. “Atletiko” 17-ci dəqiqədə Markos Lyorentenin qolu ilə hesabı açıb. “Liverpul” 40-cı dəqiqədə Dominik Soboslayın qolu ilə tarazlığı bərpa edib. Aleksis Mak Allister 50-ci dəqiqədə fərqlənərək İngiltərə təmsilçisinə qələbə qazandırıb.
Gecənin ən məhsuldar qarşılaşması Parisdə keçirilib. PSJ doğma meydanda “Slovan”ı 6:1 hesabı ilə darmadağın edib. Usman Dembele 17-ci dəqiqədə hesabı açıb, 23-cü dəqiqədə isə dublunu rəsmiləşdirib. Ferran Torres 31-ci dəqiqədə PSJ-nin üçüncü qolunu vurub. İspaniyalı hücumçu 47-ci dəqiqədə daha bir dəfə fərqlənib, 57-ci dəqiqədə isə het-trik edib. “Slovan” 59-cu dəqiqədə Süleyman Kamaranın qolu ilə fərqi azaldıb. Fabian Ruis 88-ci dəqiqədə yekun hesabı müəyyənləşdirib – 6:1.
Qeyd edək ki, "Sabah" tarixşində ilk dəfə Çempionlar Liqasının ümumi mərhələsində çıxış edir. Bakı klubu səkkiz fərqli rəqibə qarşı səkkiz oyun keçirəcək. Valdas Dambrauskasın komandası doğma meydanda "Barselona", Dortmund "Borussiya"sı, "Napoli" və Praqa "Slaviya"sı ilə qarşılaşacaq. Səfərdə isə Azərbaycan klubu "Arsenal", "Mançester Yunayted", "Vilyarreal" və "Vikinq"lə oynayacaq.
"Sabah"ın ilk matçı sentyabrın 10-da "Old Trafford"da "Mançester Yunayted"ə qarşı keçiriləcək.
22:40
Çempionlar Liqasının 2026/27 mövsümünün ümumi mərhələsində Bakının “Sabah” klubunun iki rəqibi ilk oyunlarını keçirib.
İdman.Biz xəbər verir ki, “Barselona” doğma meydanda Niderlandın “Feyenoord” klubunu 5:1 hesabı ilə məğlub edib.
Rafinya üçüncü dəqiqədə hesabı açıb. 22-ci dəqiqədə Karim Adeyemi kataloniyalıların üstünlüyünü iki topa çatdırıb. 57-ci dəqiqədə Rafinya dubl edib. Daha sonra Lamin Yamal 77-ci dəqiqədə meydan sahiblərinin dördüncü qolunu vurub. Sem Steyn 82-ci dəqiqədə “Feyenoord”un heyətində fərqi azaltsa da, katalonların yeni transferi Qabriel Jezus 85-ci dəqiqədə yekun hesabı müəyyənləşdirib – 5:1.
Digər görüşdə “Sabah”ın rəqibi “Vikinq” səfərdə “Ştutqart”a 1:3 hesabı ilə uduzub.
Matçın əsas qəhrəmanı Ermedin Demiroviç olub. Almaniya təmsilçisinin hücumçusu 20-ci dəqiqədə hesabı açıb. İki dəqiqə sonra Zlatko Tripiç tarazlığı bərpa edib. Lakin 26-cı dəqiqədə Demiroviç ikinci qolunu vurub. Bosniya və Herseqovinadan olan hücumçu daha sonra üçüncü dəfə fərqlənərək het-trik edib.
Beləliklə, “Barselona” ümumi mərhələyə böyükhesablı qələbə ilə başlayıb, “Vikinq” isə turnirdə ilk oyunundan məğlub ayrılıb.
Qeyd edək ki, hər iki klub Çempionlar Liqasının ümumi mərhələsində “Sabah”la qarşılaşacaq. Bakı təmsilçisi “Barselona”nı noyabrın 25-də Bakıda qəbul edəcək. “Vikinq”lə isə noyabrın beşində səfərdə qarşılaşacaq.
09:32
Bu gün futbol üzrə UEFA Çempionlar Liqasının 2026/2027 mövsümündə növbəti oyunlar keçiriləcək.
İdman.Biz xəbər verir ki, əsas mərhələnin ilk turunda daha altı qarşılaşma baş tutacaq.
Azərbaycan təmsilçisi “Sabah”ın əsas mərhələdəki rəqiblərindən “Barselona” “Feyenoord”u qəbul edəcək, digər rəqibləri “Napoli” və “Arsenal” isə üz-üzə gələcəklər.
“Qalatasaray” isə Portuqaliyada “Sportinq”in qonağı olacaq.
UEFA Çempionlar Liqası
Əsas mərhələ, birinci tur
9 sentyabr
20:45, “Ştutqart” - “Vikinq”
20:45, “Barselona” - “Feyenoord”
23:00, “Liverpul” - “Atletiko Madrid”
23:00, PSJ - “Slovan Bratislava”
23:00, “Sportinq” - “Qalatasaray”
23:00, “Napoli” - “Arsenal”
Qeyd edək ki, “Sabah” sentyabrın 10-da “Mançester Yunayted”in qonağı olacaq.
