Millimiz təxminən 30 il əvvəl seçmə mərhələyə 5 qol buraxaraq başlayıb

Azərbaycan yığması 2026-cı il dünya çempionatının seçmə mərhələsinə Reik­yavikdə İslandiyaya qarşı 0:5 hesablı ağır məğlubiyyətlə başladı.

İdman.biz xəbər verir ki, bu nəticə milli komandanın tarixindəki ən çətin startlardan biri kimi yadda qaldı və dərhal xoşagəlməz bir tarixi epizodu yada saldı.

Demək olar ki, 30 il əvvəl - 1996-cı il iyunun 2-də də Azərbaycan millisi 1998-ci il dünya çempionatının seçmə mərhələsinə Osloda Norveçə qarşı oyunla başlamışdı. Həmin vaxt komandamız Kazbek Tuayevin rəhbərliyi altında eyni hesabla - 0:5 uduzmuşdu. Bu görüş milli üçün seçmələrdə ağrılı debüt kimi tarixə düşdü, eyni zamanda gənc komanda üçün vacib dərs oldu.

Simvolik məqam da var: 1998-ci il seçmə kampaniyasında Azərbaycan cəmi iki ay sonra Bakıda İsveçrəni 1:0 hesabı ilə məğlub edərək reabilitasiya olunmağı bacarmışdı. Bu da göstərirdi ki, uğursuz startdan sonra belə cavab reaksiyası və mübarizə imkanı həmişə qalır.

Lakin millinin sükanı arxasında portuqaliyalı Fernando Santos olduğu halda, millidən belə geri dönüş ehtimalı azdır. Yalnız məşqçi dəyişikliyi və yerli mütəxəssisin gəlişi (yerli məşqçi çox güman ki, seçmə mərhələnin qalan oyunlarına kimi dəvət olunacaq) ölkənin əsas komandasında dönüş yarada bilər.

İdman.biz