Bu gün Birləşmiş Ərəb Əmirliklərinin paytaxtı Əbu-Dabidə keçirilən cüdo üzrə “Böyük Dəbilqə” turnirində Azərbaycan idmançıları Hidayət Heydərov və Rəşid Məmmədəliyev mübarizəni erkən mərhələlərdə dayandırıblar.
İdman.Biz xəbər verir ki, 73 kq çəki dərəcəsində çıxış edən Hidayət Heydərov 1/8 final görüşündə Tacikistan idmançısı Muhiddin Asadulloyevə məğlub olub.
Eyni çəkidə mübarizə aparan Rəşid Məmmədəliyev isə 1/16 finalda ABŞ təmsilçisi Stiven Boldbaatara yuko xalı ilə (rəqibə qarşı üstünlük qazandığı xal) uduzaraq turniri erkən başa vurub.
12:04
Bu gün Birləşmiş Ərəb Əmirliklərinin paytaxtı Əbu-Dabidə keçirilən “Böyük Dəbilqə” turnirində (73 kq) çəki dərəcəsində çıxış edən Olimpiya çempionu Hidayət Heydərov 1/16 final görüşünə qələbə ilə başlayıb.
İdman.Biz xəbər verir ki, Hidayət Heydərov ilk qarşılaşmada Moldovanı təmsil edən azərbaycanəsilli Adil Osmanov üzərində üstünlük qazanıb.
O, növbəti mərhələdə - 1/8 finalda Tacikistan idmançısı Muhiddin Asadulloyevlə üz-üzə gələcək.
10:30
Bu gün Azərbaycanın iki cüdoçusu Birləşmiş Ərəb Əmirliklərinin paytaxtı Əbu-Dabidə keçirilən “Böyük Dəbilqə” turnirində mübarizəyə qoşulacaq.
İdman.Biz xəbər verir ki, yarışın ikinci günündə Olimpiya, dünya və Avropa çempionu Hidayət Heydərov (73 kq) tatami üzərinə çıxacaq.
O, 1/16 finalda Adil Osmanov (Moldova) - Covanni Esposito (İtaliya) cütünün qalibi ilə üz-üzə gələcək.
Eyni çəkidə yarışan digər təmsilçimiz Rəşid Məmmədəliyev isə ABŞ-li Stiven Boldbaatarla münasibətlərinə aydınlıq gətirəcək.
Turnirin final bloku Bakı vaxtı ilə saat 17:00-dan etibarən başlayır.
Qeyd edək ki, təmsilçilərimiz yarışın ilk gününü medalsız başa vurublar.
