“Çətin oyun oldu. Rəqib yaxşı hazırlaşmışdı”.
İdman.biz xəbər verir ki, bunu futzal üzrə Azərbaycan millisinin baş məşqçisi Vitali Borisov DÇ-2024-ün elit-raund mərhələsi çərçivəsində Qazaxıstan oyundan sonra mətbuat konfransında deyib.
O, yetirmələrinin 2:4 hesablı məğlubiyyətini şərh edib: “10 gün əvvəldən toplanışa yığışmışdılar. Uşaqlar mübarizə apardılar, yaxşı oynadılar. Fikrimcə, hakim 3-cü qolda səhvə yol verdi. Oyunçumuz topu fitsiz başladığına görə referi yenidən fit verdi. Belədə topa yenidən toxunuş olmalı idi. Amma bizim dayanmağımıza baxmayaraq, rəqib futzalçı topu götürüb qapımıza qol vurdu. Halbuki bundan əvvəl belə bir epizod olmuşdu, hakim oyunu yenidən başlatmışdı. Rəqibin qapıçısı da onlar üçün əlavə üstünlük qazandırır. Düzdür, qolu onun səhvindən vurduq. Amma İqitanın zərbələri çox futzalçıdan qüvvətli və dəqiq olur. Qazaxıstan millisinin 6 üzvü bir klubda, 11 oyunçusu isə eyni çempionatda oynayır”.
Çalışdırıcı bildirib ki, hazırlığa oktyabrın 2-də başlasalar da, tam heyətlə cəmi 2 gün məşq ediblər: “Oyunçular klublarından gec gəldilər. İlk məşqdə cəmi 6 oyunçumuz var idi. Yalnız son məşqdə tam heyətlə hazırlaşdıq. Cavab oyununda hazırlaşacağıq. Hər şey ola bilər. Felipinyo ikinci sarı vərəqə aldığına görə, cəzalı vəziyyətə düşdü. Sağ ayaqla oynayan 2 oyunçudan birini itirdik. Orada çətin olacaq. Çünki zal tam dolacaq və komandalarını qələbəyə səsləyəcəklər. Biz də uduzmaq üçün çıxmayacağıq. Rəhbərlik qarşımıza dünya çempionatına vəsiqə qazanmaq tapşırığı qoyub”.
Qeyd edək ki, Qazaxıstanla ikinci oyun oktyabrın 11-də Astanada olacaq.
İdman.biz
