“Oyun hər iki komanda üçün gərgin keçdi. Bu da gözlənilən idi. Çünki pley-off mərhələsinə vəsiqə qazanmaq şansını saxlamaq üçün komandalara mütləq qələbə lazım idi”.
İdman.biz xəbər verir ki, bunu Azərbaycan millisinin futbolçusu Rövşən Hüseynli deyib.
DÇ-2024-ün elit-raund mərhələsi çərçivəsində Rumıniya ilə qarşılaşan və oyunun əksər hissəsində hesabda üstün olan millimiz yekunda 5:5 hesablı heç-heçə edib. Komandamız qrupda son oyununu dekabrın 20-də səfərdə Niderlanda qarşı keçirəcək. Həm Rumıniya ilə görüş, həm də qarşıdakı matçla bağlı millimizin qolkiperi federasiyanın mətbuat xidmətinə bildirib ki, heyətlə bağlı da problemlər olub: “Baş məşqçimiz seçim zamanı daha çox yerli çempionatda çıxış edən futzalçılara üstünlük verdi. Hətta ilk dəfə milliyə dəvət alan, eləcə də uzun fasilədən sonra kollektivə qoşulan futzalçılar da oldu. Komanda olaraq pis oynamadıq. Rəqibimiz Avropada 5-in 4-ə oynayan ən yaxşı yığmalardan biridir. Niderland və Qazaxıstanla oyunlarda da bu üstünlükləri sayəsində qollar vurmuşdular. Biz isə onları belə vəziyyətdə 2 dəfə cəzalandırdıq, amma meydanda oyunçu sayında üstünlük qazandıqları zaman onlar daha çox – 3 qol vurdular”.
Hüseynlinin sözlərinə görə, üzücü məqam rəqibin meydanda azlıqda qaldığı zaman cərimə etmələri və onlara 10 metrlik zərbə vurmaq hüququ qazandırmaları olub: “Halbuki, say üstünlüyü bizdə olan zaman qol buraxmamalı idik. Bu da futzalçımızın təcrübəsizliyindən irəli gəlirdi. Amma gələcək üçün yığmaya yeni isimlər qazanmış olduq. 3-4 gün ərzində yığılan komandanın belə oyun göstərməsi ümidləndirməyə bilməz.
Şanslarımız az da olsa, davam edir. Bunun üçün əvvəlcə Niderlandı yenməli, Rumıniyanın büdrəməsini və D qrupunda hadisələrin biz istəyən kimi cərəyan etməsini gözləməliyik”.
İdman.biz
