“Formula-1” üzrə sonuncu dünya çempionu Lando Norris üçün titulun gətirdiyi status gözlənilməz problemlər yarada bilər.
İdman.Biz xəbər verir ki, bu fikirləri “Formula-1”in sabiq dünya çempionu Damon Hill səsləndirib. Onun sözlərinə görə, dünya çempionu titulunun yaratdığı nüfuz və gözlənti hər zaman sürücünün xeyrinə işləmir.
Qeyd edək ki, Norris 2025-ci ilin son yarışında əldə etdiyi uğurdan sonra 2026-cı ilə çempion statusu ilə daxil olacaq. O, bununla da “McLaren” tarixində 2008/2009 mövsümündə Lyuis Hamiltondan sonra titulunu qorumağa çalışan ilk pilot olacaq.
Damon Hill bildirib ki, dünya çempionu olduqdan sonra sürücünün fikirləri komanda daxilində avtomatik olaraq daha dəyərli qəbul edilir. Lakin bu üstünlük bəzən yanlış təsəvvür yaradır. Onun sözlərinə görə, titul qazanmaq sürücünü avtomatik olaraq hər sahədə mütəxəssis etmir və əsas məsələ liderlik bacarığının komandaya düzgün ötürülməsidir.
Hill hesab edir ki, “McLaren” hər iki pilotuna güvənir, lakin Norris üçün əsas sınaq məhz bu statusun komanda daxilində yaratdığı psixoloji yük olacaq. Bu amil Oskar Piastri ilə rəqabətdə həlledici rol oynaya bilər.
Beləliklə, Norris üçün 2026 mövsümü təkcə titulun müdafiəsi deyil, həm də dünya çempionluğunun gətirdiyi təzyiqə tab gətirmək baxımından ciddi imtahan olacaq.
