Artıq məlumdur ki, "Qarabağ"la yanaşı, klubun U-19 komandası da Çempionlar Liqasının Liqa mərhələsində mübarizə aparacaq. Gənclər bu mərhələdə 6 oyun keçirəcəklər.
İdman.biz xəbər verir ki, "Qarabağ" akademiyasının koordinatoru Aftandil Hacıyev Sportal.az-a açıqlamasında deyib ki, U-19 komandasını mütləq gücləndirmək və bir neçə legioner gətirmək lazımdır.
O, işin gedişatı barədə son məlumatları verib: "Sifariş ərizəsini göndərmək üçün sentyabrın 9-na qədər vaxtımız. Nigeriya və Braziliyadan danışıq apardığımız futbolçular var. Bəyəndiyimiz futbolçuların transferini bitirməyə çalışırıq. Problem odur ki, ilk oyunumuz səfərə düşüb, "Benfika" ilə qarşılaşırıq. Afrikalıların isə demək olar həmişə sənəd problemi olur, viza məsələlərini həll etmək müşkülə çevrilir. Bu mənada braziliyalılarla daha rahatdır.
Artıq bir braziliyalı futbolçu ilə anlaşmağa çox yaxınıq. Çalışırıq onu tez gətirək. Axtarışlarımız davam edir. Çünki Nigeriyadan bəyəndiyimiz 2 futbolçu var, onlar alınmasa, gərək başqa variantları nəzərdən keçirək. Problemimiz əsasən ön xətdədir. Özümüzdə olan yaxşı futbolçular bir neçə il əvvəl, yəni biz bura gələnə qədər başqa klublara gediblər... Ona görə də güclənməliyik. Minimum 3 legioner gətirməyi düşünürük".
İdman.biz
