ABŞ-də keçirilən 2025-ci il FIFA klubların dünya çempionatı davam edir.
İdman.biz xəbər verir ki, ilkin mərhələdə mübarizə hərəsində dörd iştirakçı olmaqla 8 qrupda gedir.
Bu gün Bakı vaxtilə səhər D qrupunda sonuncu qarşılaşmalar keçirilib.
"Çelsi" çətinlik çəkmədən "Esperans"a qalib gəlib (3:0), "Los Anceles" - "Flamenqo" oyunu isə son dəqiqələrdə vurulan iki qolla heç-heçə bitib (1:1).
Beləliklə, 7 xalla birinci olan "Flamenqo" və 6 xalla ikinci yeri tutan "Çelsi" növbəti mərhələyə yüksəliblər.
1/8 finalda "Çelsi" "Benfika" ilə, "Flamenqo" isə "Bavariya" ilə qarşılaşacaq.
Bu gün F qrupunda da mübarizə başa çatacaq. Hesabında 4 xal olan "Borussiya Dortmund" xalsız autsayder "Ulsan"la qarşılaşacaq. "Mamelodi Sandauns" və "Fluminense" komandalarının görüşündə isə 1/8 finala vəsiqə uğrunda gərgin mübarizə gedəcək. Cənubi Afrika təmsilçisinin 3, Braziliya klubunun isə 4 xalı var.
Qeyd edək ki, qarşılaşmalar Bakı vaxtilə saat 23:00-da başlayacaq.
İdman.biz
