Almaniyanın “Bavariya” futbol komandası hücumçusu Harri Keynlə müqavilənin müddətini uzadıb.
İdman.Biz klubun rəsmi saytına istinadən xəbər verir ki, 33 yaşlı ingiltərəli futbolçu ilə yeni sözləşmə 2029-cu il iyunun 30-na qədər nəzərdə tutulub.
Keyn 2023-cü ilin yayında İngiltərənin “Tottenhem” komandasından Münhen təmsilçisinə keçib. O, həmin vaxtdan “Bavariya”nın heyətində bütün turnirlər üzrə 161 oyunda 156 qol vurub.
Təcrübəli hücumçu Almaniya komandası ilə iki dəfə Bundesliqa çempionu olub, bir dəfə ölkə kubokunu və iki dəfə Frans Bekkenbauer Superkubokunu qazanıb.
Keyn ötən həftə dünyanın ən yaxşı futbolçusuna təqdim edilən “Qızıl top” mükafatına da layiq görülüb.
Qeyd edək ki, futbolçunun əvvəlki müqaviləsi 2027-ci ilin yayında başa çatmalı idi.
