Futbol üzrə İtaliya A Seriyasında 2026/27 mövsümünün üçüncü turuna start verilib.
İdman.Biz xəbər verir ki, turun proqramı “Cenoa” – “Komo” matçı ilə başlayıb. Genuya təmsilçisi 19-cu dəqiqədə Milutin Osmaiçin qolu ilə hesabı açsa da, Sesk Fabreqasın komandası fasiləyə qədər meydan sahiblərinin qapısına üç dəfə yol tapıb. Martin Baturina, Assan Diao və Niko Pas fərqləniblər. Fasilədən sonra Diao dubl edib və yekun hesabı müəyyənləşdirib – 4:1. Bir həftə əvvəl Neapolda sensasiyalı qələbə qazanan “Komo” 7 xal toplayaraq, ən azı şənbə günü keçiriləcək oyunlara qədər turnir cədvəlinin ilk pilləsinə yüksəlib.
Turun qalan hissəsinin əsas hadisələri Milan və Turində baş verəcək. Əvvəlcə son çempion “İnter” “Napoli”ni qəbul edəcək, bir gün sonra isə ilk iki oyunda qələbə qazanan “Yuventus” və “Milan” “Alyans” stadionunda üz-üzə gələcək.
“İnter” – “Napoli”
İtaliya çempionu üçün mövsümün ilk böyük sınağı. Kristian Kivunun komandası maksimum 6 xalla bu görüşə çıxır. “İnter” əvvəlcə evdə “Montsa”nı 4:1, daha sonra səfərdə “Kalyari”ni 1:0 hesabı ilə məğlub edib. Hakan Çalhanoğlu hər iki oyunda fərqlənib və hər iki qolu cərimə meydançasının kənarından vurduğu zərbələrlə qeydə alıb. Milanlılar ilk iki turun bir sıra hücum göstəricilərinə, o cümlədən zərbələrin sayına və orta topa sahibolma faizinə görə A Seriyasında liderdir.
Çempionata uğurlu start “İnter”in təsirli seriyasını da davam etdirib. “Neradzurri” artıq 14 rəsmi oyundur məğlub olmur – 9 qələbə və 5 heç-heçə. Komanda bu görüşlərin hər birində ən azı bir qol vurub. Ev oyunlarında da “İnter” 13 qarşılaşmadır məğlubiyyət tanımır.
“Napoli” isə çempionata daha qeyri-sabit başlayıb. Massimiliano Alleqrinin komandası ilk turda səfərdə “Cenoa”nı 2:0 hesabı ilə məğlub edib, lakin daha sonra doğma meydanda gözlənilmədən “Komo”ya 1:2 hesabı ilə uduzub. Beləliklə, neapollular Milan səfəri öncəsi 3 xala sahibdir. Alleqri özü görüşdən əvvəl “İnter”i çempionatın əsas favoriti adlandırıb, lakin üçüncü turda Skudettonun taleyini müəyyənləşdirəcək oyun barədə danışmaq üçün hələ çox tez olduğunu vurğulayıb.
Qonaqların ciddi itkisi də var. Sağlamlığı ilə bağlı problem aşkarlanan Skott Maktomini tibbi müdaxiləyə məruz qalıb və ilkin qiymətləndirməyə əsasən, təxminən bir ay yaşıl meydanlardan uzaq qalacaq. Bundan əlavə, sentyabrın əvvəlində qasıq yırtığı ilə bağlı əməliyyat keçirən Covane də milli komandaların oyunları üçün yaranacaq fasilədən sonra meydana qayıda bilər.
Yeri gəlmişkən, komandaların qarşılaşmalarının tarixi “İnter”in xeyrinədir. A Seriyasında tərəflər 160 dəfə üz-üzə gəlib. Milanlılar 70, “Napoli” 48 qələbə qazanıb, 42 oyun isə heç-heçə başa çatıb. Lakin son illərdə üstünlük artıq neapolluların tərəfindədir. “Napoli” çempionatda son 5 qarşılaşmanın heç birində məğlub olmayıb – 1 qələbə və 4 heç-heçə. Komandaların “San-Siro”dakı son 3 oyunu heç-heçə başa çatıb. “İnter” A Seriyasında doğma meydanda “Napoli”ni 3 oyundur məğlub edə bilmir. Bununla belə, daha geniş seriyaya nəzər saldıqda, “neradzurri” çempionatda evdə neapollulara qarşı artıq 9 oyundur uduzmur – 5 qələbə və 4 heç-heçə.
Azərbaycanlı azarkeşlər üçün “Napoli”nin əlavə marağı var. Belə ki, neapollular Bakı “Sabah”ının Çempionlar Liqasının əsas mərhələsindəki rəqiblərindən biridir. Komandalar 2027-ci il yanvarın 20-də Bakıda qarşılaşacaqlar. Yeri gəlmişkən, sentyabrın 9-da “Napoli” Çempionlar Liqasına digər Bakı təmsilçisi “Sabah”ın rəqibi olan London “Arsenal”ına qarşı ev oyunu ilə start verəcək.
“Yuventus” – “Milan”
Turində azarkeşləri daha bir möhtəşəm qarşılaşma gözləyir. “Yuventus” və “Milan” ilk iki turdan sonra 100 faizlik nəticə ilə – 6 xalla üz-üzə gələcəklər.
Lusiano Spallettinin komandası əvvəlcə səfərdə A Seriyasının debütantı “Frozinone”ni minimal hesabla – 1:0 məğlub edib, daha sonra evdə “Parma”nı 2:0 hesabı ilə keçib. İkinci oyunun taleyi fasilədən sonra həll olunub. Əvəzlənərək meydana çıxan Niko Qonsales və Teun Koopmeyners fərqləniblər. Beləliklə, “Yuventus” hər iki matçda qalib gəlib və hələ qol buraxmayıb.
Qeyd edək ki, transfer pəncərəsinin son günləri Turin klubunun heyətində ciddi dəyişikliklərə səbəb olub. Nik Voltemade və Pap Matar Sarr komandaya qoşulub, Conatan Devid isə “Atletiko”ya icarəyə göndərilib. Bununla yanaşı, “Yuventus” ciddi heyət itkiləri ilə də üzləşib. Kenan Yıldız sol ayağının beşinci daraq sümüyünün sınığı səbəbindən əməliyyat keçirib, Kefren Tyuram sağ dizindən əməliyyat olunub. Xuan Kabal isə bud əzələsindən zədələnib. Buna görə də Spalletti mövsümün ilk böyük matçına heç də optimal heyətlə çıxmayacaq.
“Milan” da yeni baş məşqçisi Ruben Amorimin rəhbərliyi altında 6 xaldan 6 xal toplayıb. “Rossoneri” ilk turda səfərdə “Torino”nu 2:1 hesabı ilə məğlub edib. Alfadjo Sisse klubdakı ilk rəsmi oyununda qol vurub, ikinci topu isə Adrien Rabyo rəqib qapısından keçirib. Daha sonra “San-Siro”da çempionatın debütantı “Venesia” 2:0 hesabı ilə məğlub edilib. Qonsalu Ramuş “Milan”ın heyətində ilk rəsmi qolunu vurub, ikinci top isə avtoqol olub. İki turdan sonra komandanın top fərqi 4:1-dir.
“Milan”ın heyəti də son həftələrdə ciddi şəkildə yenilənib. Rafael Leao klubu tərk edib. “Rossoneri”nin son transferlərindən biri isə “Nottingem Forest”dən satınalma hüququ ilə icarəyə götürülən Omari Hatçinson olub. Bundan əvvəl komandanın heyətinə 2031-ci ilə qədər müqavilə imzalayan belçikalı vinger Dieqo Moreyra qoşulub.
Qeyd edək ki, komandaların qarşılaşmalar statistikası bu duelin miqyasını bir daha göstərir. Bazar günü “Yuventus” və “Milan” A Seriyasında 183-cü dəfə üz-üzə gələcəklər. Əvvəlki 182 oyunun 69-da Turin təmsilçisi, 53-də isə Milan klubu qalib gəlib. Daha 60 matç heç-heçə başa çatıb. “Yuventus”un hazırkı seriyası xüsusilə diqqətçəkəndir: komanda A Seriyasında “rossoneri”yə qarşı son 6 oyunda qol buraxmayıb. Ötən mövsüm hər iki qarşılaşma 0:0 hesabı ilə başa çatıb.
Beləliklə, bazar günü axşam ən azı iki komandadan biri ideal nəticəsini itirəcək. Təbii ki, tərəflər oyunu heç-heçə başa vurmasa. Qeyd edək ki, ötən mövsümün yekunlarına əsasən Çempionlar Liqasından kənarda qalan “Yuventus” və “Milan” üçün belə start əsas avrokuboka qayıtmaq uğrunda mübarizədə xüsusilə vacibdir.
A Seriyasının 3-cü turunun oyun cədvəli
4 sentyabr
“Cenoa” – “Komo” – 1:4
5 sentyabr
17:00. “Fiorentina” – “Torino”
20:00. “İnter” – “Napoli”
22:45. “Roma” – “Atalanta”
6 sentyabr
17:00. “Frozinone” – “Venesia”
17:00. “Parma” – “Montsa”
20:00. “Bolonya” – “Sassuolo”
22:45. “Yuventus” – “Milan”
7 sentyabr
20:00. “Kalyari” – “Leççe”
22:45. “Udineze” – “Latsio”
Sentyabrın 5-nə A Seriyasının turnir cədvəli
“Komo” – 7
“Roma” – 6
“İnter” – 6
“Milan” – 6
“Yuventus” – 6
“Atalanta” – 6
“Latsio” – 6
“Udineze” – 4
“Frozinone” – 3
“Napoli” – 3
“Sassuolo” – 3
“Kalyari” – 3
“Leççe” – 3
“Torino” – 0
“Bolonya” – 0
“Parma” – 0
“Montsa” – 0
“Venesia” – 0
“Cenoa” – 0
“Fiorentina” – 0
