DÇ-2026-nın seçmə mərhələsi çərçivəsində Azərbaycan və İslandiya yığmaları arasında keçiriləcək qarşılaşmanı Azərbaycan futboluna yaxşı bələd olan hakim idarə edəcək.
İdman.Biz-in məlumatına görə, 13 noyabrda Bakıda baş tutacaq oyunu monteneqrolu hakimlər briqadası idarə edəcək. Briqadaya baş hakim Nikola Dabanoviç rəhbərlik edəcək.
Monteneqrolu referi üçün qarşıdakı görüş azərbaycanlı təmsilçilərin iştirakı ilə baş hakim kimi idarə edəcəyi beşinci oyun olacaq.
Xüsusilə, məhz Dabanoviç DÇ-2018-in seçmə mərhələsində Azərbaycan millisinin San-Marino üzərindəki ev oyununu (5:1, Bakı) idarə etmişdi. O, həmçinin 10 sentyabr 2018-ci ildə UEFA Millətlər Liqasının Malta ilə keçirilən qarşılaşmasında da (1:1, Ta Kali) baş hakim olmuşdu.
Bundan başqa, Dabanoviç 17 fevral 2022-ci ildə UEFA Konfrans Liqasının pley-off mərhələsində “Marsel” və “Qarabağ” arasında “Velodrom” stadionunda keçirilən ilk oyunu da (3:1) idarə etmişdi.
Həmçinin 2015-ci ilin mart ayında o, 19 yaşadək futbolçulardan ibarət yığmalar arasında Avro-2015-in seçmə mərhələsində Fransa və Azərbaycan komandaları arasında keçirilən oyunda (2:0) ədaləti qorumuşdu.
Maraqlıdır ki, monteneqrolu hakim daha əvvəl İslandiya millisinin iştirak etdiyi qarşılaşmada da iş başında olub. Bu, 2021-ci ilin oktyabrında DÇ-2022-nin seçmə mərhələsində İslandiya və Ermənistan yığmaları arasında keçirilən və 1:1 hesabı ilə başa çatan oyunda baş vermişdi.
Azərbaycan və İslandiya yığmaları arasında qarşıdakı oyun cümə axşamı keçiriləcək və Bakı vaxtı ilə saat 21:00-da başlayacaq.
Teymur Tuşiyev
