Yeniyetmələr boksçular arasında Bakı birinciliyi start götürüb - FOTO

Xəbərlər
10 Oktyabr 2023 15:21
137
Yeniyetmələr boksçular arasında Bakı birinciliyi start götürüb - FOTO

Boks üzrə yeniyetmələr arasında Bakı birinciliyi start götürüb.

İdman.biz xəbər verir ki, Boks Mərkəzində keçirilən yarışda paytaxtın 32 klub və idman cəmiyyətinin 202 boksçusu mübarizə aparacaqlar.

Döyüşlərdən öncə birinciliyin açılış mərasimi təşkil olunub. Tədbirdə çıxış edən Bakı şəhər Gənclər və İdman Baş İdarəsinin idman sektorunun müdiri Rəşad Əliyev yarışın əhəmiyyətindən danışıb. O, paytaxtın yeniyetmə boksçularının gələcəkdə Azərbaycan millisinin heyətinə düşəcəyinə və burada uğur qazanacağına inam ifadə edib.

Azərbaycan Boks Federasiyası prezidentinin müşaviri Samir Hüseynov ölkəmizdə yeni nəsil boksçuların yetişməsini sevindirici hal adlandırıb. O, bu il Sloveniyada məktəblilər arasında Avropa birinciliyində də yığmamızın kifayət qədər yüksək nəticələr əldə etdiyini, 2 qızıl və 2 bürünc medal qazandığını deyib: “Boksçularımızın güclü potensialı var. Biz bu il regionlarda da zona yarışlar təşkil etmişik. Bakıda da boksçularımızın inkişafı üçün əlimizdən gələni edəcəyik. Əsas hədəf Azərbaycan bayrağını ən yüksək zirvələrdə ucaltmaqdır”.

Azərbaycan Respublikasının Dövlət Himni səsləndikdən sonra yarış açıq elan olunub.

Birinciliyin ilk günündə 47 döyüş baş tutacaq. Yarışda final döyüşləri isə oktyabrın 14-də olacaq.

Qeyd edək ki, birinciliyin baş hakimi Qalib Əbiyevdir.

İdman.biz