Kişilər arasında Azərbaycan Basketbol Liqasının final seriyası ölkə çempionatları tarixinə düşəcək.
İdman.biz xəbər verir ki, “Sabah”la “Neftçi” arasında duel son 15 ildə yarışın ən uzun finalı olacaq.
4 görüşdən sonra hesab 2:2 olduğu üçün çempionun müəyyənləşməsinə ən azı daha iki matç keçirilməlidir. Bu isə o deməkdir ki, seriya ən azı 6 qarşılaşmadan ibarət olacaq.
2010-cu ildən sonrakı dövrdə isə heç bir final bu qədər uzun sürməyib. Bunun səbəblərindən biri də qalibin 4 qələbə qazanmasının zəruriliyidir.
Əvvəllər seriya 2, son illər 3 qələbəyədək davam edib, bəzən isə liqa sistemi tətbiq olunub. Ən uzun seriya 2 il əvvəl baş tutub. “Sabah” 2023-cü ildə “Gəncə”ni 5 matçda üstələyib – 3:2.
Qeyd edək ki, “Neftçi” və “Sabah” arasında 5-ci oyun mayın 11-də keçiriləcək.
İdman.biz
