Bu həftə avrokubok turnirlərinin ilk oyunları keçirilib. Təbii ki, azərbaycanlı azarkeşlərin bütün əsas diqqəti “Qarabağ”ın qrup turnirində çıxış etdiyi Avropa Liqasına yönəlib. Hər zaman qarşısına yüksək hədəflər qoyan ölkənin ən güclü klubu pley-offa vəsiqə qazanmaq iddialarını açıq şəkildə ortaya qoyaraq, Norveçin “Molde” komandası üzərində evdə qələbə (1:0) ilə başlayıb.
İdman.biz-in məlumatına görə, cari avrokubok mövsümü Qurban Qurbanovun komandası üçün xüsusidir. Avrokubokların qrup mərhələsinə növbəti çıxış klub üçün artıq onuncu olub. Bu illər ərzində Azərbaycan çempionu beynəlxalq arenada özünü güclü komanda kimi göstərib. Hər il "İnter", "Çelsi" "Marsel" kimi güclü Avropa klubları ilə oynayanda başqa cür ola bilməz. “Qarabağ”ın hansı heyətlə çıxış etməsindən asılı olmayaraq, bu müddət ərzində klubun avrokubok DNT-sini formalaşdırdığını deyə bilərik.
Bu mövsüm başlamazdan əvvəl komanda daha çox Latın Amerikasından bir sıra məqsədyönlü transferlər edib - sağ cinah müdafiəçisi mövqeyinə Matteo Silva alınıb və hücum xətti başqa bir braziliyalı - Juninyo tərəfindən gücləndirilib. Kabo Verde millisində çıxış edən Patrik Andrade Belqradın "Partizan" klubundan gəlib. Sonuncu xətti isə ağdamlıların çoxdan gözlədiyi Andrey Lunyov xeyli gücləndirib. “Molde” ilə oyunda bütün yeni gələn oyunçular meydana çıxıb və qələbəyə öz töhfələrini veriblər. Yeganə qolu isə “Qarabağ” forması ilə ilk qola imza atan Andrade vurub.
Qarşılaşma həm də Azərbaycan ordusunun Qarabağda keçirdiyi lokal antiterror tədbirləri zamanına düşdüyü üçün Ağdam klubu üçün xüsusilə həyəcanlı və emosional alınıb.
“Bu gün biz yenidən qələbəmizi hiss etdik və insanlar öz evlərinə qayıtdılar. Ona görə də oyun öncəsi əlavə həyəcan var idi. Oyunçularıma oyun intizamına görə təşəkkür edirəm. Qarşılaşma gərgin keçdi və sona qədər temp aşağı düşmədi”, - deyə Qurban Qurbanov qələbədən sonra qeyd edib.
Qrup mərhələsinin başlanğıcında qazanılan üç xal özünə inam baxımından önəmlidir. “Qarabağ”ın kifayət qədər çətin qrupu var. Burada “Molde”dən başqa, Almaniyanın “Bayer” (Leverkuzen) və İsveçin "Haken" klubları da yer alıb. Bundesliqa təmsilçisi, yeri gəlmişkən, evdə "Haken" üzərində inamlı qələbə qazanıb (4:0) və təbii ki, dördlüyün favoritidir. Bununla belə, ağdamlılar ötən illərdə Almaniya futbolunun təmsilçiləri ilə dəfələrlə görüşüblər - Dortmund “Borussiya”sından tutmuş “Frayburq”a kimi.
Təbii ki, Xabi Alonsonun rəhbərlik etdiyi “Bayer”lə oyunlar istənilən komanda üçün güc sınağıdır. Amma Q.Qurbanovun hər görüşdən əvvəl apardığı təfərrüatlı təhlili və taktika üzərində işləməyini nəzərə alsaq, “Qarabağ”ın belə rəqibə qarşı yaxşı oynaya biləcəyi şübhəsizdir. “Qarabağ”ın hazırkı heyətində isə “Bayer”ə çox bələd olan, komandanın güclü və zəif tərəflərini bilən futbolçu var. Söhbət "Bayer"lə oyunlara hazırlıq zamanı komanda yoldaşlarına məsləhətləri ilə də kömək edə bilən Lunyovdən gedir.
Amma "Bayer"dən əvvəl "Qarabağ"ı başqa sınaq gözləyir - Avropa Liqasının qrup mərhələsində klubumuz oktyabrın 5-də İsveçdə “Haken”lə oynayacaq. Pley-offa vəsiqə uğrunda mübarizə nöqteyi-nəzərindən Azərbaycan çempionu səfərdə mütləq üç xal qazanmalıdır.
Zəki Feyzullayev
İdman.biz
