“Qarabağ” futbol komandası noyabrın 6-da Misli Premyer Liqasının 11-ci turunda “Turan Tovuz”u qəbul edəcək.
İdman.Biz xəbər verir ki, “Azersun Arena”da keçiriləcək qarşılaşma saat 18:00-da başlayacaq.
Görüşü Fərid Hacıyevin rəhbərlik etdiyi hakimlər briqadası idarə edəcək. Ona Asiman Əzizli və Rəhman İmami kömək edəcəklər. Dördüncü hakim funksiyasını Vüqar Həsənli yerinə yetirəcək.
VAR hakimi Tural Qurbanov, AVAR hakimi isə Tərlan Talıbzadə olacaq. Oyuna hakim-inspektor kimi Şahin Cəfərov, AFFA nümayəndəsi kimi Elgiz Abbasov təyinat alıblar.
Qarşılaşma turnir cədvəlinin yuxarı pillələrindəki mübarizə baxımından xüsusi əhəmiyyət daşıyır.
“Qarabağ” doqquz oyundan sonra 19 xalla üçüncü pillədə qərarlaşıb. Ağdam təmsilçisi beş qələbə qazanıb, dörd heç-heçə edib və hələ məğlub olmayıb. Komanda lider “Neftçi”dən iki xal geri qalır və bir oyun az keçirib.
“Turan Tovuz” isə 10 qarşılaşmada topladığı 18 xalla dördüncü yerdədir. Tovuz təmsilçisinin aktivində beş qələbə, üç heç-heçə və iki məğlubiyyət var.
“Qarabağ” qalib gələcəyi təqdirdə, ən azı “Neftçi”nin oyunu başa çatanadək turnir cədvəlinin zirvəsinə yüksələcək. “Turan Tovuz” isə qələbə sayəsində ikinci pilləyə qalxacaq.
Qeyd edək ki, əvvəlki turda “Qarabağ” səfərdə “Qəbələ” ilə qolsuz heç-heçə edib. “Turan Tovuz” isə doğma meydanda “Sabah” üzərində 3:2 hesablı qələbə qazanıb.
