“Bizim üçün bundan gözəl sevinc ola bilməz. Əsas odur ki, torpaqlarımız işğaldan azad edildi. Xankəndi şəhərində yenidən biz varıq”.
Bunu İdman.biz saytına Milli Məclisin deputatı Aqil Abbas Azərbaycan Kubokunun 1/8 final mərhələsində Xankəndində “Qarabağ” - MOİK qarşılaşmasından (1:0) sonra deyib.
O bildirib ki, uzun illərdən sonra yenidən Xankəndi şəhər stadionunda futbol oynamaq böyük qələbədir: “Cənab Prezident İlham Əliyevin qeyd etdiyi kimi, biz burada doğulmuşuq və bura bizimdir. Xankəndi bizimdir. Üç gündən sonra İlham Əliyevin ad günüdür, o bizə bu münasibətlə şəhərimizi və stadionu hədiyyə etdi. Futbolçularımız da qarşılıq olaraq gözəl oyun nümayiş etdirdilər”.
Aqil Abbas Avropa Liqasının pley-offunda Azərbaycan çempionunun Portuqaliya “Braqa”sı ilə oyunu da dəyərləndirib. O bildirib ki, Ağdam təmsilçisi rəqibini darmadağın edəcək.
Qeyd edək ki, “Qarabağ” “Braqa” ilə gələn il fevralın 15-də səfərdə, 1 həftə sonra evdə oynayacaq.
İdman.biz