Bu gün, oktyabrın 31-də Astanada keçirilən güləş üzrə dünya çempionatında Azərbaycanın iki təmsilçisi medal uğrunda mübarizə aparacaq. Millimizin əsas ümidi 86 kq çəki dərəcəsində finala yüksələn Arseniy Djioyev. O, həlledici görüşdə amerikalı Kayl Deyklə qarşılaşacaq. Georgi Meşvildişvili isə (125 kq) bürünc medal uğrunda mübarizə aparacaq.
İdman.Biz xəbər verir ki, Djioyev Deyk arasındakı qarşılaşma amerikalının titulları ilə yanaşı, onların əvvəlki görüşünün nəticəsi baxımından da maraq doğurur. Belə ki, Azərbaycan güləşçisi fevralın 25-də Albaniyanın paytaxtı Tiranada keçirilən “Muhamet Malo” reytinq turnirində bürünc medal uğrunda görüşdə rəqibini 4:1 hesabı ilə məğlub edib.
24 yaşlı Djioyev böyüklər arasında dünya çempionatında ilk dəfə finala yüksəlib. Onun aktivində 2025-ci ildə Zaqrebdə keçirilən dünya çempionatının bürünc medalı, 2026-cı il Avropa çempionatının gümüşü, 2024-cü il qitə birinciliyinin bürüncü və 2025-ci il U-23 Avropa çempionatının qızıl medalı var.
Azərbaycanlı güləşçi Astanada finala inamlı qələbələrlə yüksəlib. O, Bəhreyn təmsilçisi Xıdır Saypudinovu 7:1, hindistanlı Puşpender Dalalı 7:2, 2025-ci ilin dünya çempionu, yunanıstanlı Georgios Kuqiomtsidisi 3:1 hesabı ilə məğlub edib. Yarımfinalda isə gürcüstanlı Vladimir Qamkrelidzeyə 9:1 hesabı ilə qalib gəlib.
Lakin finalda onu müasir güləşin ən titullu idmançılarından biri gözləyir. 35 yaşlı Kayl Deyk dördqat dünya çempionudur. O, 2018, 2019, 2021 və 2022-ci illərdə dünya çempionu olub. ABŞ-li həmçinin 2023-cü il dünya çempionatının gümüş mükafatçısı, Tokio-2020 və Paris-2024 Olimpiadalarının bürünc medalçısıdır. Bundan başqa, NCAA çempionluğunu dörd dəfə qazanıb.
Maraqlıdır ki, Deyk dünya çempionatlarında bütün titullarını daha aşağı çəki dərəcələrində əldə edib. O, iki dəfə 79 kq, iki dəfə isə 74 kq çəkidə dünya çempionu olub. ABŞ-li 2025-ci ilin aprelində uzun müddət çıxış etdiyi aşağı çəkilərdən 86 kq-a qayıdıb. Bu çəkidə sonuncu dəfə 2016-cı ildə ABŞ-ın Olimpiya seçmə yarışlarında mübarizə aparmışdı.
Deykin 86 kq-da keçirdiyi ilk beynəlxalq yarış isə yalnız 2026-cı ilin fevralında Tiranada baş tutub. Həmin turnirdə o, məhz Cioyevə məğlub olub. Beləliklə, amerikalının hazırkı çəki dərəcəsində beynəlxalq təcrübəsi nisbətən azdır.
Cioyev isə ən azı 2023-cü ildən 86 kq-da çıxış edir. Bu müddətdə o, dünya və Avropa çempionatları da daxil olmaqla bir sıra nüfuzlu yarışlarda iştirak edib. Çəki dərəcəsinin xüsusiyyətlərinə bələd olması, bu çəkidə mübarizə təcrübəsi və Deyk üzərində əvvəlki qələbəsi Azərbaycan təmsilçisinin üstünlükləri sırasındadır.
Bununla belə, amerikalını kiçik görmək olmaz. Deyk Astanada yarımfinalda Avropa çempionu İbrahim Qadiyevi 6:3 hesabı ilə məğlub edib. Bununla o, fevralda Tiranada 4:11 hesabı ilə uduzduğu rəqibindən revanş alıb. Bu nəticə amerikalının yeni çəki dərəcəsinə uyğunlaşdığını göstərir.
Djioyev qalib gələcəyi təqdirdə Deyk beşinci dünya çempionluğunu qazanacaq və üç fərqli çəki dərəcəsində dünya çempionu olan ilk titulunu əldə edəcək. Azərbaycanlı güləşçi isə böyüklər arasında dünya çempionatında ilk dəfə qızıl medal qazanmaq imkanı əldə edib.
Millimizin digər medal ümidi Georgi Meşvildişvilidir. 125 kq-da çıxış edən güləşçimiz yarımfinalda rusiyalı Abdulla Kurbanova 0:5 hesabı ilə uduzub.
İkiqat Avropa çempionu, 2025-ci il dünya çempionatının gümüş mükafatçısı və Paris-2024 Olimpiadasının bürünc medalçısının üçüncü yer uğrunda görüşdə rəqibi Macarıstanı təmsil edən Vladislav Baytsayev olacaq. O, təsəlliverici görüşlərdə əvvəlcə keniyalı Coel Tukayı, daha sonra isə polşalı Robert Baranı məğlub edib.
Meşvildişvilinin bu rəqiblə əvvəlki görüşlərinin nəticələri onun xeyrinədir. Azərbaycanlı pəhləvan bu ilin aprelində Tiranada keçirilən Avropa çempionatının finalında Baytsayevi 8:0 hesabı ilə məğlub edərək qitə çempionu titulunu qoruyub. Bundan əvvəl isə 2025-ci il dünya çempionatının və Avropa çempionatının 1/4 finalında macarıstanlı güləşçiyə müvafiq olaraq 7:0 və 5:0 hesabı ilə qalib gəlib.
Beləliklə, Meşvildişvili yaxşı tanıdığı və dəfələrlə məğlub etdiyi rəqiblə qarşılaşacaq. Bu amil onun bürünc medal uğrunda mübarizədə psixoloji üstünlüyünə çevrilə bilər.
Qeyd edək ki, dünya çempionatının final mərhələsi Bakı vaxtı ilə saat 17:00-da başlayacaq. Proqramda 61, 70, 86 və 125 kq çəki dərəcələrində medal görüşləri yer alıb. Djioyev Deyk arasındakı final qarşılaşmasının təxminən saat 18:30-19:00-da başlanacağı gözlənilir. Dəqiq vaxt əvvəlki görüşlərin müddətindən və ardıcıllığından asılı olacaq.
Xatırladaq ki, Azərbaycan millisi Astanada indiyədək üç medal qazanıb. Yunan-Roma güləşində Eldəniz Əzizli (55 kq) və Sənan Süleymanov (77 kq) dünya çempionu olub, Nihat Məmmədli (63 kq) isə gümüş medal əldə edib. Djioyev finala yüksəlməklə komandamızın dördüncü medalını təmin edib. Bu mükafatın qızıl olması da mümkündür.
