“Mançester Yunayted”in yeni baş məşqçisi Maurisio Poçettino İngiltərəyə gələrək klubun Karrinqtondakı məşq bazasına baş çəkib.
İdman.Biz xəbər verir ki, Mançester təmsilçisi argentinalı mütəxəssisin gəlişindən görüntüləri sosial şəbəkə hesabında paylaşıb.
Klubda onu qarşılayanlara Poçettino belə deyib:
“Çox sağ olun! Burada olduğum üçün çox şadam. Bu möhtəşəm klubda çalışmaq mənim üçün böyük şərəfdir. İşə başlamağı səbirsizliklə gözləyirəm!”
“Mançester Yunayted” yeni baş məşqçinin köməkçilərinin adlarını da rəsmən açıqlayıb. Məşqçilər korpusuna Xesus Peres, Migel D'Aqostino, Toni Ximenes, Alek Skott və Sebastiano Poçettino daxil edilib.
Bu mütəxəssislər əvvəllər Poçettino ilə müxtəlif komandalarda, o cümlədən “Espanyol”, “Sauthempton”, “Tottenhem”, PSJ və “Çelsi”də çalışıblar.
Klub həmçinin Maykl Karrik, Trevis Binnion, Conni Evans, Stiv Holland, Kreyq Mouson və Conatan Vudgeytin ayrıldığını təsdiqləyib.
“Mançester Yunayted” onların fəaliyyətini yüksək qiymətləndirərək göstərdikləri fədakarlığa və peşəkarlığa görə təşəkkürünü bildirib.
Qeyd edək ki, Poçettinonun təyinatı noyabrın 13-də rəsmiləşdirilib. Onun klubla müqaviləsi 2029-cu ilə qədər nəzərdə tutulub. Argentinalı mütəxəssisin rəhbərliyi altında “Mançester Yunayted” ilk oyununu noyabrın 22-də səfərdə “Liverpul”a qarşı keçirəcək.
