“Sabah”ın baş məşqçisi Valdas Dambrauskas UEFA Çempionlar Liqasının Liqa mərhələsinin dördüncü turunda Norveçin “Vikinq” klubuna 1:4 hesablı məğlubiyyətdən danışıb.
İdman.Biz xəbər verir ki, litvalı mütəxəssis oyunsonrası mətbuat konfransında komandasının qarşılaşmaya yaxşı hazırlaşdığını, lakin rəqibin ikinci hissədə üstünlük qazandığını bildirib.
“Bura Çempionlar Liqasıdır və burada oyunlar həmişə çətin keçir. Biz Norveçə çox yaxşı hazırlaşaraq gəlmişdik. İlk hissədə tamamilə bərabər mübarizə getdi. Hər iki komanda qol imkanlarından istifadə etdi. İkinci hissədə isə oyun daha açıq keçdi. Rəqib təkbətək mübarizələrdə daha üstün idi. Belə qarşılaşmalarda sürət amilinə xüsusi diqqət yetirmək lazımdır”.
Dambrauskas komandasının azlıqda qalmasına baxmayaraq, mübarizəni davam etdirdiyini də qeyd edib:
“Təəssüf ki, buraxdığımız qol bizi məğlubiyyətə apardı. Halbuki azlıqda qaldıqdan sonra da yaxşı oynayırdıq. Çempionlar Liqasında səviyyə tamamilə fərqlidir. Kiçik bir səhv belə qapımızda qolla nəticələnə bilər”.
Xatırladaq ki, “Sabah” səfər qarşılaşmasında hesabı açsa da, sonradan dörd qol buraxaraq məğlub olub. Dörd turdan sonra üç xalı olan Bakı klubu turnir cədvəlində 31-ci pillədə qərarlaşıb.
