“Barselona” “Mançester Siti”nin futbolçusu Niko O'Rayli ilə maraqlanır.
İdman.Biz “El Nacional”a istinadən xəbər verir ki, kataloniyalılar 21 yaşlı ingilis futbolçunu universallığına görə izləyirlər. O'Rayli sol cinah müdafiəçisi ilə yanaşı, mərkəz və hücumameyilli yarımmüdafiəçi mövqelərində də oynaya bilir.
Qeyd olunur ki, Pep Qvardiola futbolçunun “Mançester Siti”nin əsas komandasında üzə çıxmasına kömək edib. İspaniyalı mütəxəssis klubun yetirməsindən sol cinah müdafiəsində istifadə etməyə başlayıb və O'Rayli bu mövqedə öz güclü tərəflərini nümayiş etdirib.
Materialda bildirilir ki, “Barselona”nın idman direktoru Deku gənc və universal futbolçuya böyük məbləğdə sərmayə qoymaq qərarına gəlsə, O'Rayli komandanın tələblərinə uyğun seçim ola bilər.
“Əgər Deku gənc və universal futbolçuya külli miqdarda pul yatırmaq qərarına gəlsə, O'Rayli demək olar ki, bütün tələblərə tam cavab verir. O, sol müdafiə mövqeyini bağlaya, meydanın mərkəzində oynaya və Flikin yüksək pressinqini dəstəkləməyə qadir fiziki cəhətdən güclü futbolçulara ehtiyacı olan komandanın heyətində inkişaf edə bilər”, – deyə materialda qeyd olunub.
Ehtimal olunur ki, O'Raylinin potensial transferi “Barselona”ya təxminən 70 milyon avroya (140 milyon manat) başa gələ bilər.
