Azərbaycanı təmsil edən fiqurlu konkisürən Aleksandr Plyuşşenko bu mövsüm “Qızıl top” mükafatına layiq gördüyü futbolçuların adlarını açıqlayıb.
İdman.Biz "Sport24"-ə istinadən xəbər verir ki, Gürcüstanda olan rusiyalı idmançı Xviça Kvaratsxeliyanın mükafatı qazanmasını istədiyini bildirib.
“Xviça Kvaratsxeliyanın almasını çox istərdim. Çünki onun keçən mövsüm etdikləri, necə oynaması inanılmaz idi. O, Çempionlar Liqasını qazandı, amma təəssüf ki, dünya çempionatında iştirak etmədi. Lakin Xviça inanılmaz dərəcədə möhtəşəm idi”, – Plyuşşenko deyib.
O, Harri Keyn, Kilian Mbappe və Usman Dembele haqqında da fikirlərini bölüşüb: “Əlbəttə, Harri Keyn də layiq idi. Ümumiyyətlə, Çempionlar Liqasının ən yaxşı bombardirlərindən biridir, çoxlu qol vurdu. Dünya çempionatında da üçüncü yeri tutdu. Kilian Mbappe də pis deyildi – bu, mənim ən sevdiyim futbolçulardan biridir. Amma bu mövsüm, əlbəttə ki, “Real Madrid” çox yaxşı oynamadı. Fransa da, təəssüf ki, uduzdu”.
Plyuşşenko Usman Dembele və Rafinya ilə bağlı da fikirlərini bildirib: “Usman Dembele keçən il qazandıqlarının hamısını yenidən qazandı. Keçən il, sözsüz ki, onun vicdanlı “Qızıl top”u var idi. Rafinya yaxşı formada idi, amma Dembele ədalətli “Qızıl top”u götürdü. Və əgər o, bu mövsüm “Qızıl top”u götürsə, prinsipcə, pis olmaz”.
“Harri Keyn, Dembele, Xviça və ya Mbappe. Amma mən Xviçaya azarkeşlik edəcəyəm”, – Plyuşşenko əlavə edib.
