Azərbaycan futbol millisi Litva ilə heç-heçə etdi - İDMAN.BİZ KAUNASDAN - YENİLƏNİB + VİDEO

27 Sentyabr 2026 18:58
1 488
Azərbaycan futbol millisi Litva ilə heç-heçə etdi - İDMAN.BİZ KAUNASDAN - YENİLƏNİB + VİDEO

Azərbaycan futbol millisi UEFA Millətlər Liqasının 2026/27 mövsümündə ilk oyununu keçirib.

İdman.Biz-in Kaunasa ezam olunmuş əməkdaşı xəbər verir ki, yığmamız D2 qrupunda səfərdə Litva ilə qarşılaşıb. Kaunas şəhərindəki Dariaus ir Girėno stadionunda keçirilən görüş 1:1 hesabı ilə başa çatıb.

Litva millisi doqquzuncu dəqiqədə hesabı açıb. Armandas Kuçis penalti zərbəsini dəqiq yerinə yetirib.

Azərbaycan yığması isə cəmi beş dəqiqə sonra tarazlığı bərpa edib. 14-cü dəqiqədə Mahir Emreli fərqlənərək hesabı 1:1 edib.

Qarşılaşmanın qalan hissəsində komandalar hesabı dəyişə bilməyiblər.

UEFA Millətlər Liqasının qrup mərhələsi çərçivəsində keçiriləcək növbəti oyunumuz oktyabrın 1-də Bakıda baş tutacaq. Millimiz Tofiq Bəhramov adına Respublika Stadionunda Lixtenşteyn yığmasını qəbul edəcək. Qarşılaşmanın start fiti Bakı vaxtı ilə saat 20:00-da səslənəcək.

Litva seçməsi isə qrupdakı ilk görüşündə səfərdə Lixtenşteyni iki cavabsız qolla üstələyib.

Xatırladaq ki, Litva - Azərbaycan oyununu işıqlandırmaq üçün bir qrup azərbaycanlı jurnalist AFFA-nın təşkilatçılığı və “Misli”nin dəstəyi ilə Kaunas şəhərinə ezam olunub.

18:04

UEFA Millətlər Liqasının 2026/27 mövsümündə keçirilən Litva - Azərbaycan qarşılaşmasında ikinci hissə başladı.

İdman.Biz xəbər verir ki, ilk 45 dəqiqədən sonra hesab bərabərdir - 1:1.

17:51

Azərbaycan millisinin UEFA Millətlər Liqasının 2026/27 mövsümündə Litva ilə keçirdiyi səfər oyununda ilk hissə başa çatıb.

İdman.Biz-in Kaunasa ezam olunmuş əməkdaşı xəbər verir ki, Kaunas şəhərindəki Dariaus ir Girėno stadionunda keçirilən qarşılaşmada fasiləyə 1:1 hesabı ilə yollanılıb.

Litva millisi doqquzuncu dəqiqədə önə keçib. Armandas Kuçis penalti zərbəsini dəqiq yerinə yetirib.

Azərbaycan yığması hesabı çox keçmədən bərabərləşdirib. 14-cü dəqiqədə Mahir Emreli fərqlənərək hesabı 1:1 edib.

17:16

14-cü dəqiqədə Mahir Emreli hesabı bərabərləşdirir - 1:1.

17:11

Litva millisi doqquzuncu dəqiqədə hesabı açır. Penalti zərbəsini dəqiq yerinə yetirən Armandas Kuçis oldu - 1:0.

16:57

Azərbaycan millisi UEFA Millətlər Liqasının 2026/27 mövsümündə ilk oyununa başlayıb.

İdman.Biz xəbər verir ki, yığmamız D Liqasının ikinci qrupunda səfərdə Litva ilə qarşılaşır.

Kaunas şəhərindəki Dariaus ir Girėno stadionunda keçirilən görüş Bakı vaxtı ilə saat 17:00-da start götürüb.

16:13

Azərbaycan futbol millisinin UEFA Millətlər Liqasında Litva ilə keçirəcəyi oyun üçün start heyəti müəyyənləşib.

İdman.Biz xəbər verir ki, yığmanın baş məşqçisi Ayxan Abbasov meydana aşağıdakı 11 futbolçunu buraxacaq:

Start heyəti: 1. Emil Balayev, 2. Rəhman Daşdəmirov, 15. Bədavi Hüseynov (K), 4. Rahil Məmmədov, 3. Rüfət Abbasov, 19. Tellur Mütəllimov, 6. Abdulla Xaybullayev, 20. Aleksey İsayev, 13. Emil Səfərov, 9. Renat Dadaşov, 10. Mahir Emreli.

Ehtiyat oyunçular: Anton Krivotsyuk, Toral Bayramov, Emin Mahmudov, Ayxan Hüseynov, Aydın Bayramov, Elvin Bədəlov, Oruc Məmmədov, Vüsal İsgəndərli, Cəlal Hüseynov, Rüfət Abdullazadə, Musa Qurbanlı, Rəvan Mirzəməmmədov.

10:28

Azərbaycan millisi bu gün UEFA Millətlər Liqasının 2026/27 mövsümündə mübarizəyə başlayacaq.

İdman.Biz xəbər verir ki, yığmamız D Liqasının ikinci qrupunda səfərdə Litva ilə qarşılaşacaq. Görüş Kaunas şəhərindəki Dariaus ir Girėno stadionunda keçiriləcək. Matç Bakı vaxtı ilə saat 17:00-da başlayacaq.

Qarşılaşmanı Kiprdən olan hakimlər briqadası idarə edəcək. Baş hakim Menelaos Antoniu olacaq. Ona yan xətt hakimləri Pavlos Georgiu və Eraklis Komodromos kömək edəcəklər. Dördüncü hakim funksiyasını Konstantinos Fellas yerinə yetirəcək.

Litva millisi turnirə qələbə ilə başlayıb. Baltikyanı ölkə ilk turda səfərdə Lixtenşteyni 2:0 hesabı ilə məğlub edib. Azərbaycan isə qrupdakı ilk matçını məhz bu gün keçirəcək.

AFFA-nın məlumatına görə, qarşılaşma üçün 8 500 bilet satılıb. Azərbaycan millisinin təxminən 100 azarkeşi Kaunasda komandaya dəstək verəcək.

Qeyd edək ki, Azərbaycan və Litva milliləri növbəti dəfə oktyabrın 4-də üz-üzə gələcəklər. Həmin görüş Azərbaycanda keçiriləcək.

İdman.Biz