Almaniyanın “Borussiya” (Münhenqladbax) futbol klubu Aleksander Blessini baş məşqçi vəzifəsinə təyin edib.
İdman.Biz xəbər verir ki, bu barədə Bundesliqa təmsilçisinin mətbuat xidməti məlumat yayıb.
53 yaşlı almaniyalı mütəxəssislə 2028-ci ilə qədər müqavilə imzalanıb. Blessin bu postda sentyabrın 13-də vəzifəsindən ayrılan Eygen Polanskini əvəzləyib.
Polanskinin istefasından doqquz gün sonra “Borussiya” yeni baş məşqçisini müəyyənləşdirib. Komandanın son oyununda, “Maynts”a 3:4 hesabı ilə məğlub olduğu qarşılaşmada isə baş məşqçi vəzifəsini müvəqqəti olaraq köməkçi məşqçi Yan-Morits Lixte yerinə yetirib.
Ştutqartda anadan olan Blessin peşəkar futbolçu kimi “Ştutqart”ın heyətində Bundesliqada yeddi oyun keçirib. O, məşqçilik karyerasına “RB Leyptsiq”in gənclər komandasında başlayıb. 2012-ci ildən əvvəlcə klubun U-17 komandasında köməkçi məşqçi, daha sonra isə baş məşqçi kimi fəaliyyət göstərib.
Blessin 2020-ci ilin iyulundan 2021-ci ilin yanvarına qədər Belçikanın “Ostende” klubunda çalışıb. Buradakı fəaliyyəti zamanı mövsümün sonunda Belçikada ilin məşqçisi seçilib. Daha sonra “Cenoa”ya keçən Blessin 2021-ci ilin yanvarından dekabrına qədər İtaliya klubunda işləyib.
2023-cü ilin iyulundan bu ilin iyununa qədər isə “Union Sent-Jilluaz”ın baş məşqçisi olub. Belçika klubunda çalışdığı müddətdə komandanı Belçika Kubokunda qələbəyə daşıyıb.
Daha sonra Almaniyaya qayıdan Blessin Bundesliqada “Sankt-Pauli”yə rəhbərlik edib. O, ilk mövsümündə komandanı Bundesliqada saxlamağı bacarıb. Lakin növbəti mövsümdə “Sankt-Pauli” aşağı liqaya düşüb və Blessinlə yollar ayrılıb.
Yeni baş məşqçinin qarşısında “Borussiya”nı hazırkı vəziyyətdən çıxarmaq vəzifəsi dayanır. Münhenqladbax təmsilçisi 2026/2027 mövsümündə Bundesliqada keçirdiyi ilk 4 oyunun hamısında məğlub olub.
