“Mançester Yunayted”in ən perspektivli yetirmələrindən biri Cey Cey Qabriel Azərbaycan təmsilçisi “Sabah”ın qapısına het-trik etməsindən bir neçə gün sonra gözlənilmədən İngiltərə klubundan ayrılmaq istədiyini bildirib.
İdman.Biz “Telegraph Sport”a istinadən xəbər verir ki, 15 yaşlı futbolçu “Mançester Yunayted”də qeydiyyatının dərhal qüvvəyə minməklə ləğv olunması tələbi ilə rəsmi bildiriş göndərib. Belə olan halda Qabriel azad agent statusu qazana bilər. Bununla yanaşı, nəşrin məlumatına görə, o, hazırda dərhal başqa kluba keçməyi planlaşdırmır.
Bu vəziyyət “MY” rəhbərliyi üçün gözlənilməz olub. Qabriel 11 yaşından klubun sistemindədir və son illərdə akademiyanın ən istedadlı futbolçularından biri hesab olunur. O, ötən mövsüm “Mançester Yunayted”in ən yaxşı gənc futbolçusuna təqdim olunan Cimmi Merfi mükafatının ən gənc sahibi olub. Rayan Giqqs daha əvvəl onu nəsil istedadı adlandırıb və inkişaf yolunu Ueyn Runinin karyerası ilə müqayisə edib.
Xüsusilə maraqlıdır ki, Qabrielin qərarı “Sabah”a qarşı parlaq çıxışından dərhal sonra verilib. Sentyabrın 10-da “Leigh Sports Village” stadionunda 15 yaşlı hücumçu UEFA Gənclər Liqasının ümumi mərhələsinin ilk tur matçında het-trik edib. “Mançester Yunayted” U-19 Azərbaycan komandasını 5:0 hesabı ilə darmadağın edib, Qabriel isə üç qol vuraraq görüşün əsas qəhrəmanlarından biri olub. UEFA da turnirin start turunun icmalında onun het-trikini ayrıca qeyd edib.
Bundan əlavə, “Sabah”la matçın ertəsi günü futbolçunun sosial şəbəkə hesablarından “Mançester Yunayted”lə bağlı qeydlər yoxa çıxıb. Bir həftə keçməmiş klub Qabrielin əməkdaşlığı dayandırmaq istəyi barədə məlumatlandırılıb.
Vəziyyəti futbolçunun yaşı da çətinləşdirir. Qabriel yalnız oktyabrın 6-da 16 yaşı tamam olduqdan sonra təqaüd müqaviləsi imzalaya bilər, İngiltərədə peşəkar müqavilə isə 17 yaşdan mümkündür. “Mançester Yunayted” hələlik onun qeydiyyatını ləğv etməyə razılıq verməyib və vəziyyətdən çıxış yolu tapmağa ümid edir. Premyer Liqanın qaydalarına əsasən, yetkinlik yaşına çatmayan futbolçunun qeydiyyatına xitam verilməsi üçün klubun, futbolçunun və onun valideyni və ya qəyyumunun razılığı tələb olunur. Razılıq əldə edilmədiyi halda məsələ liqanın müzakirəsinə çıxarıla bilər.
Qeyd edək ki, Qabriel mütəmadi olaraq “MY”nin daha yuxarı yaş qruplarında çıxış edir və əsas komanda ilə məşq keçir. O, ötən mövsüm klubun gənclər komandalarında 29 matçda 26 qol vurub. Hazırkı vəziyyət yaranana qədər futbolçu əsas komandada yaxın zamanda debüt edə biləcək namizədlərdən biri kimi də nəzərdən keçirilirdi.
